عوام کو سڑکوں پر لانےکا معاملہ،بشریٰ بی بی اور علیمہ خان کو ناکامی ہوگی،شیرافضل مروت نے واضح کردیا

اسلام آباد(کھوج نیوز)احتجاجی مارچ،عوام کو سڑکوں پر لانے میں بانی پی ٹی آئی کی اہلیہ اور بہنیں ناکام ہوں گی ،اس امر کا اظہار تحریک انصاف کے رہنما شیر افضل مروت نے اپنے ایک بیان میں کیا ،شیر افضل مروت نے کہا کہ بانی پی ٹی آئی کی اہلیہ یا بہنوں کی کال پر کارکن نہیں نکلیں گے بلکہ وہ صرف بانی پی ٹی آئی کی کال پر ہی نکلیں گے۔ شیر افضل مروت نے کہا کہ بانی پی ٹی آئی اس نظریے پر قائم ہیں کہ موروثیت سیاست کے لیے زہر ہے۔ خواہش ہے کہ احتجاج میں کردار ادا کر سکوں لیکن پشاور والی میٹنگ میں انہیں نہیں بلایا گیا۔

شیر افضل مروت نے کہا کہ انہیں معلوم ہوا ہے کہ میٹنگ میں ان سے متعلق بھی بات چیت ہوئی ہے۔ انہوں نے کہا کہ 2 دن میں احتجاج کا لائحہ عمل طے نہ ہوا تو ہم شاید بھرپور دھرنا نہ دے پائیں گے۔ کے پی سے تو لوگ آ جائیں گے لیکن سوال یہ ہے کہ ہم ڈی چوک پر قدم کیسے جمائیں گے، ابھی تک اس احتجاج سے متعلق عوام کو کوئی موٹیویشنل پیغام بھی نہیں دیا گیاہے۔

واضح رہے کہ پی ٹی آئی گزشتہ روز پشاور میں ہونے والے اجلاس میں بشری بی بی کی جانب سے پارٹی رہنماں اور عہدیداروں کو 24 نومبر کے احتجاج سے متعلق اہم احکامات جاری کیے گئے تھے۔ پی ٹی آئی ذرائع کے مطابق بشری بی بی نے 24 نومبر کو احتجاج میں ہر حلقے سے ایم این اے کو 10 ہزار اور ہر ایم پی اے کو 5 ہزار افراد ساتھ لانے کی ہدایت کی تھی۔