ن لیگی کے سینئر رہنماء صدیق الفاروق کا انتقال، صدر اور وزیراعظم سمیت دیگر سیاستدانوں کا اظہار افسوس

راولپنڈی (کھوج نیوز) بچھڑا کچھ اس ادا سے کہ رت ہی بدل گئی، مسلم لیگ ن کے سینئر رہنماء صدیق الفاروق انتقال کر گئے جبکہ صدر اور وزیراعظم سمیت دیگر سیاستدانوں نے اظہار افسوس بھی کیا ہے۔

تفصیلات کے مطابق صدیق الفاروق کے خاندانی ذرائع نے بھی مسلم لیگ ن کے سینئر رہنما کے انتقال کی تصدیق کرتے ہوئے بتایا کہ وہ کچھ عرصے سے دل کے عارضے میں مبتلا تھے۔ ذرائع کا بتانا ہے کہ مرحوم لیگی رہنما کی نماز جنازہ کے وقت کا اعلان بعد میں کیا جائے گا۔ واضح رہے کہ صدیق الفاروق سابق وزیراعظم نوازشریف کے پریس سیکرٹری اورچیئرمین متروکہ وقف املاک بھی رہے، صدیق الفاروق نے 3 سال جیل بھی کاٹی جبکہ وہ ایک کتاب کے بھی مصنف تھے۔

وزیراعظم شہباز شریف نے پاکستان مسلم لیگ ن کے سینئر رہنما صدیق الفاروق کے انتقال پر اظہار افسوس کرتے ہوئے مرحوم کے درجات کی بلندی کے لیے دعا کی اور مرحوم کے اہل خانہ سے اظہار تعزیت کیا۔ شہباز شریف کا کہنا تھا مرحوم صدیق الفاروق کی پاکستان مسلم لیگ ن کیلئے خدمات ہمیشہ یاد رکھی جائیں گی، صدیق الفاروق کے انتقال سے پارٹی ایک مخلص اور زیرک سیاستدان سے محروم ہوگئی، اللہ تعالی مرحوم کو جنت الفردوس میں جگہ عطا فرمائیں۔