پیسے ختم، ٹکٹ ہولڈر پیسے دیں نہیں تو بائے بائے… پی ٹی آئی کی نئی منطق

اسلام آباد(کھوج نیوز) پارٹی چلانے کے لئے پیسے ختم، ٹکٹ ہولڈرز پیسے دیں نہیں تو بائے بائے ……… پاکستان تحریک انصاف (پی ٹی آئی) کے عہدیداروں کی نئی منطق سامنے آگئی۔

تفصیلات کے مطابق ذرائع نے بتایا ہے کہ پاکستان تحریک انصاف (پی ٹی آئی ) اس وقت شدید مالیاتی بحران کا شکار ہے اور پارٹی کے ساتھ منسلک ملازمین کو 3 ماہ سے تنخواہیں بھی نہیں ملیں، جس کی وجہ سے تحریک انصاف نے فوری طور پر فنڈریزنگ مہم شروع کردی ہے۔ پاکستان تحریک انصاف کی جانب سے اپنے ارکان اسمبلی اور ٹکٹ ہولڈرز سے سالانہ 2 لاکھ 40 ہزار روپے فنڈ مانگے گئے ہیں، جس کے اکٹھا کرنے کی ذمے داری چیف وہپ عامر ڈوگر اور پارلیمانی لیڈرز کو سونپی گئی ہے۔ ذرائع کا کہنا ہے کہ پارٹی کی جانب سے فنڈز بانی پی ٹی آئی عمران خان کی ہدایت کے بعد مانگے گئے ہیں۔ اس سلسلے میں پی ٹی آئی چیئرمین، سیکرٹری جنرل، ایڈیشنل سیکرٹری جنرل کی طرف سے مراسلے بھجوا دیے گئے ہیں، جس میں کہا گیا ہے کہ پارٹی اس وقت تاریخ کے مشکل مالیاتی بحران سے گزر رہی ہے۔