پی ٹی آئی کا عدالتی فیصلے چیلنج کرنے کا اعلان

اسلام آباد(کھوج نیوز) پاکستان تحریک انصاف نے پارٹی ر ہنمائوں اور کارکنان کے خلاف حالیہ عدالتی فیصلے کو چیلنج کرنے کا اعلان کر دیا ہے یہ اعلان بیرسٹر گوہر نے پارٹی اجلاس میں کیا۔

تفصیلات کے مطابق اسلام آباد میں آل پارٹیز کانفرنس سے خطاب میں بیرسٹرگوہر نے کہا کہ پاکستان تحریک انصاف آئندہ کا جمہوری اور عوامی لائحہ عمل بہت جلد دیگی، پی ٹی آئی ان تمام جمہوری الاؤئنسزکا ساتھ دیگی جو آئین، قانون اور انصاف کی بات کریں گے، اپنے حق، اپنے لیڈر اور ظلم کے خلاف آواز اٹھانا ہر شہری کا جمہوری حق ہے،کسی جماعت کے کارکنوں نے اتنی قربانیاں نہیں دیں جتنی پی ٹی آئی کارکنوں نے دیں، کوئی سوچ بھی نہیں سکتا کہ پرامن ریلی پر گولیاں چلیں گی۔

ان کا کہنا تھا کہ ان فیصلوں سے جمہوریت ڈی ریل ہو جائیگی، چاہتے ہیں سسٹم چلے اور ایوان مضبوط ہو، ایوان میں واپس جانا ہے یا بائیکاٹ کرنا ہے اس کا فیصلہ بانی پی ٹی آئی کریں گے۔ بیرسٹر گوہر کا کہنا تھا کہ3 دن میں تین سزائیں ہوئی اور 45 سال کی سزا سنائی گئی،بانی پی ٹی آئی پر پریشر کے لیے ان کی اہلیہ کو سزا سنائی گئی، قومی اسمبلی میں پارلیمانی لیڈر زرتاج گل کو سزا سنائی گئی، آج فیصل آباد اے ٹی سی کے فیصلے میں اپوزیشن لیڈر سینیٹ، قومی اسمبلی کو سزا ہوئی، ہم نے ان سب کے باوجود ریاست کے ساتھ چلنے کافیصلہ کیا۔