معروف اداکارہ ارمینا خان کی کار کے ساتھ خوفناک حادثہ

کراچی(شوبز ڈیسک) پاک فلم و ڈرامہ انڈسٹری کی معروف اداکارہ ارمینا خان کی کار کے ساتھ خوفناک حادثہ پیش آیا جس میں اداکارہ محفوظ رہیں۔ ارمینا خان نے اپنے آفیشل انسٹاگرام ہینڈل پر مختلف اسٹوریز شیئر کرتے ہوئے اپنے مداحوں کو اپنے حالیہ حادثے سے متعلق آگاہ کیا۔ اداکارہ نے کہا کہ ایک ٹرک نے ہماری چھوٹی سی گاڑی کو ٹکر ماری، ہم اس خوفناک حادثے میں مرنے ہی والے تھے کہ اللہ تعالیٰ نے ہمیں زندہ بچا لیا۔

اُنہوں نے کہا کہ الحمدللہ! میں اور میری فیملی محفوظ رہی لیکن میں اس حادثے کی وجہ سے ابھی تک کانپ رہی ہوں۔ ارمینا خان نے اپنی گاڑی کی تصویر شیئر کرتے ہوئے کہا کہ ٹرک نے اُسی طرف ٹکر ماری جہاں میری بیٹی بیٹھی ہوئی تھی لیکن میں نے پہلے ہی حفاظت کے لیے دُعا پڑھ لی تھی جس کی وجہ سے ہم محفوظ رہے۔ اداکارہ نے اپنے مداحوں کی نیک خواہشات کے لیے شکریہ ادا کرتے ہوئے کہا کہ مجھے اور میرے اہلخانہ کو اپنی دُعاؤں میں لازمی یاد رکھیں۔