ہوشیار خبردار… موٹر وہیکل آرڈیننس 2025جاری، وارڈنز کو کھلی چھوٹ، شہری سر پکڑ کر بیٹھ گئے
لاہور(کھوج نیوز) ہوشیار خبردار …… گورنر پنجاب کی منظوری کے بعد موٹر وہیکل آرڈیننس 2025ء جاری کر دیا گیا جس کے بعد وارڈنز کو کھلی چھوٹ دینے پر شہری سر پکڑ کر بیٹھ گئے ہیں۔
تفصیلات کے مطابق پنجاب میں ڈرائیونگ لائسنس اور ٹریفک سسٹم میں سخت اقدامات کرتے ہوئے گورنر پنجاب کی منظوری کے بعد صوبائی موٹر وہیکل آرڈیننس 2025 جاری کردیا گیا، آرڈیننس کے تحت ٹریفک سگنل کی خلاف ورزی پر موٹرسائیکل کو 2 ہزار اور تھری ویلر کو 3 ہزار روپے جرمانہ ہوگا جب کہ کار کو 5 ہزار روپے، دو ہزار سی سی گاڑیوں کو 10 ہزار روپے اور دو ہزار سی سی سے زائد کی گاڑیوں کو سگنل خلاف ورزی پر15 ہزار روپے جرمانہ کیا جائے گا۔
معلوم ہوا ہے کہ اوور سپیڈنگ پرجرمانے میں 300 فیصد تک اضافہ ہوا ہے، غیر فٹنس سرٹیفکیٹ گاڑی چلانے پر ناصرف ایک لاکھ روپے تک جرمانہ بلکہ جیل بھی ہوگی، ون وے کی خلاف ورزی پر 6 ماہ قید یا 50 ہزار روپے تک جرمانہ ہوگا جب کہ کم عمرڈرائیونگ کی سزا دگنی کردی گئی ہے اب والدین بھی اس کے ذمہ دار ہوں گے، پیلی یا جعلی نمبرپلیٹ پر سخت سزائیں ہوں گی، دوبارہ خلاف ورزی پر اضافی جرمانہ کیا جائے گا، نان سٹینڈرڈ شیشوں پر 6 ماہ تک قید کی سزا ہوگی، گاڑی کی رجسٹریشن، دستاویزات ساتھ نہ رکھنے پر بھی سخت کارروائی ہوگی۔
بتایا گیا ہے کہ اوورلوڈنگ پر تھری ویلر کو 3 ہزار روپے، دو ہزار سی سی سے کم گاڑیوں کو 5 ہزار روپے اور 2ہزار سی سی سے زائد گاڑیوں کو 10 ہزار روپے جرمانہ ہوگا جب کہ ٹرالر کو اوور لوڈنگ پر 15 ہزار روپے جرمانہ ہوگا، دھواں چھوڑنے والی موٹرسائیکل کو 2 ہزار روپے، تھری ویلر گاڑی کو 3 ہزار روپے، بڑی گاڑی کو 8 ہزار روپے اور پبلک ٹرانسپورٹ کو دھواں چھوڑنے پر 15 ہزار روپے جرمانہ کیا جائے گا۔
