افغانستان اور پاکستان میں تجارت کا سلسلہ مزید بڑھنے کا امکان

اسلام آباد(کھوج نیوز) افغانستان کا پاکستان سے تجارت پر انحصار مزید بڑھ گیا’ نئی حکومت کے پہلے ہی ماہ میں افغانستان کے لیے برآمدات میں بڑا اضافہ ریکارڈ کیا گیا، مارچ میں سالانہ بنیادوں پر افغانستان کے لیے برآمدات میں 20.6 فیصد اضافہ ہوا۔

تفصیلات کے مطابق ذرائع نے بتایاکہ فروری کے مقابلے مارچ کے مہینے میں افغانستان کے لیے برآمدات میں12.5 فیصد اضافہ ہوا۔ ذرائع کا کہنا ہے کہ مارچ 2024 میں افغانستان کے لیے پاکستانی برآمدات 11 کروڑ 70 لاکھ ڈالرز رہیں جبکہ فروری 2024 میں افغانستان کے لیے پاکستانی برآمدات 10 کروڑ 40 لاکھ ڈالرز تھیں۔ ذرائع کے مطابق مارچ 2023 میں افغانستان کے لیے برآمدات کا حجم 9 کروڑ 70 لاکھ ڈالرز تھا۔ ذرائع نے بتایا کہ مارچ میں سالانہ بنیادوں پر افغانستان سے درآمدات میں 49.3 فیصد کمی ہوئی، مارچ 2024 میں افغانستان سے درآمدات کا حجم 3 کروڑ 60 لاکھ ڈالرز رہا جبکہ مارچ 2023 میں یہ حجم 7 کروڑ 10 لاکھ ڈالرز تھا۔ افغانستان کا پاکستان سے تجارت پر انحصار مزید بڑھ گیا، برآمدات 20.6 فیصد بڑھ گئیں۔