امریکہ پاکستان کی بجائے اپنی ڈیمو کریسی پر دھیان دے: خواجہ آصف کا کرارا جواب
لیبیا ، عراق اور شام جیسے ممالک اجڑ گئے آج کل فلسطینیوں کا جو قتل عام ہو رہا ہے اس کا سب سے بڑا سہولت کار امریکہ ہے: خواجہ آصف کا امریکہ کو کرارا جواب
اسلام آباد(کھوج نیوز) پاکستان مسلم لیگ ن کے رہنماء و وفاقی وزیر دفاع خواجہ آصف نے امریکہ کو کرارا جواب دیتے ہوئے کہا کہ امریکہ پاکستان کی بجائے اپنی ڈیمو کریسی پر دھیان دے تو بہتر ہوگا۔
تفصیلات کے مطابق وفاقی وزیر دفاع خواجہ آصف کا کہنا تھا کہ امریکہ پہلے اپنے انتخابات کو شفاف بنائے پھر دوسروں پر الزام لگائے، امریکہ سے پوچھتا ہوں کہ گذشتہ 100 سالوں میں کتنی جمہوری حکومتوں کا تختہ الٹا ہے، واشنگٹن نے کتنے فوجی انقلابات کی سرپرستی کی ہے۔ انہوں نے کہا کہ میرے وطن پاکستانی میں جو کچھ بھی ہو رہا ہو امریکہ سمیت کسی تیسرے فریق کو یہ حق نہیں پہنچتا کہ وہ میرے وطن کے اندرونی معاملات میں مداخلت کرے، ہم امریکی جنگوں میں ساتھ دینے کے نتائج بھگت رہے ہیں۔
ان کا کہنا تھا کہ ویتنام، جنوبی امریکہ اور مشرق وسطی میں کروڑوں افراد اپنی جان سے گئے ، ہنستے بستے معاشروں کو اجاڑ دیا گیا جبکہ لیبیا ، عراق اور شام جیسے ممالک اجڑ گئے آج کل فلسطینیوں کا جو قتل عام ہو رہا ہے اس کا سب سے بڑا سہولت کار امریکہ ہے پاکستان سے متعلق اس قسم کے مطالبات سے پہلے امریکہ کو جمہوریت کے لئے اپنا 100 سالہ ریکارڈ دیکھنا چاہیے۔
انہوں نے کہا کہ تحریک انصاف کا اوورسیز چیپٹر در حقیقت امریکہ کا چیپٹر ہے یہ کل تک امریکہ کو ایبسالوٹلی ناٹ کہتے تھے جبکہ آج جشن رہے ہیں ، تحریک انصاف فی الوقت امریکہ میں بہت متحرک ہے جس نے اکسا کر پاکستان کے خلاف قرار داد منظور کروائی، تحریک انصاف بار بار کہہ رہی ہے کہ اس کو جی ایچ کیو سے بات کرنی ہے۔ ان کا کہنا تھا کہ اس بارے میں تحریک انصاف سے پارلیمنٹ میں اور عوام کی عدالت میں پوچھ سکتے ہیں کہ یہ غزہ میں ہونے والی سازش کو بھی حصہ ہیں یہ اس سے جڑے ہوئے ہیں پاکستان میں ہونے والی دہشت گردی کا صرف ایک مقصد ہے کہ پاکستان معاشی طور پر مضبوط نہ ہوسکے اور یہاں کبھی سکون نہ آ سکے، جب تک معاشی استحکام نہیں آئے گا تب تک سیاسی استحکام نہیں آئے گا۔
