خیبرپختونخوا حکومت نے سمری کی منظوری کیلئے نیا طریقہ کار جاری کر دیا

پشاور (کھوج نیوز) خیبرپختونخوا حکومت نے سمری کی منظوری کے لئے نیا طریقہ کار جاری کر دیا ہے اور اس حوالے سے وزیراعلیٰ خیبرپختونخوا نے اس کی منظوری کیلئے سمری پر دستخط بھی کر دیئے ہیں۔

تفصیلات کے مطابق خیبر پختونخوا میں ای سمری کے اجرا، دفتری امور اور فائل ورک کو پیپرلس بنانے کی طرف اہم پیشرفت ہوئی ہے۔ گزشتہ روز صوبے میں پہلی بار سمری کو دستخط کے لیے کاغذ کے بجائے سوفٹ کاپی میں بھیجا گیا جو وزیراعلیٰ علی امین گنڈاپور کو آن لائن سسٹم کے ذریعے موصول ہوئی اور پھر وزیراعلی کے پی نے پہلی ای سمری پر دستخط کیے۔ اس موقع پر وزیراعلیٰ کے پی نے کہا کہ سرکاری مراسلے، اعلامیے اور حکم نامے بھی ڈیجیٹائز کیے جا رہے ہیں، اجلاسوں کے لیے ورکنگ پیپرز اور دیگرامور کو ای سسٹم پر منتقل کیا جا رہا ہے۔ علی امین گنڈاپور نے مزید کہا کہ اس اقدام سے وقت کی بچت ہوگی اور وسائل کے ضیاع کو بھی روکا جا سکے گا، ہم عمران خان کے وژن کے مطابق خیبرپختونخوا کو ڈیجیٹیل بنائیں گے۔