اسلام آباد(کھوج نیوز) وزیر داخلہ محسن نقوی نے انتشار، بیامنی اور انتہاء پسندی پھیلانے والوں کو فائنل وارننگ دیتے ہوئے کہا کہ جو بھی ایسا کرنے کی کوشش کرے گا اس کو معاف نہیں کیا جائیگا۔
تفصیلات کے مطابق وزیر داخلہ محسن نقوی سے جمعیت علمائے پاکستان کے سیکرٹری جنرل اویس نورانی نے ملاقات کی جس میں مذہبی ہم آہنگی، رواداری اور قومی اتحاد پر تبادلہ خیال کیا گیا۔ ملاقات میں اتفاق کیا گیاکہ کسی بھی بیگناہ کے خلاف ہرگز کوئی کارروائی نہیں جائے گی اور بے گناہ افراد کو رہا کیا جائے گا، کسی بھی مدرسے کو بند نہیں کیا جائے گا اور شرپسندوں سے سختی سے نمٹا جائے گا۔
انہوں نے کہا کہ بیامنی، انتشار اور انتہاپسندی پھیلانے والے عناصر سے آہنی ہاتھوں سے نمٹا جائے گا، مذہبی ہم آہنگی اور صبر وتحمل کے فروغ میں علمائے کرام کی قابل قدر خدمات ہیں، پائیدار امن اور رواداری کے فروغ کیلئے تمام طبقات کو بھر پور کردار ادا کرنا ہے، دینی تعلیم کا فروغ ہم سب کا مشترکہ فریضہ ہے۔ وزیر داخلہ کا کہنا تھاکہ قانون ہاتھ میں لینے کی اجازت ہرگز نہیں دی جائے گی، ریاست کے خلاف ہتھیار اٹھانے کی قطعا اجازت نہیں دی جا سکتی اور قائد اعظم کے پاکستان میں شرپسند عناصر اور انتہا پسندوں کی کوئی گنجائش نہیں۔
