غزہ (مانیٹرنگ ڈیسک) اسرائیلی فوجیوں نے ظلم کی انتہاء کر دی ہے، شہید ہونے والے فلسطینیوں کی لاشوں کو بھی نہ چھوڑا ، فلسطینی شہداء کی لاشوں سے بے حرمتی کا انکشاف سامنے آیا ہے۔
انٹرنیشنل میڈیا کے مطابق غزہ کے سرکاری میڈیا آفس کے ڈائریکٹر اسماعیل ثوابتہ نے کہا کہ قابض اسرائیلی فوج نے گزشتہ 3 دنوں کے دوران ریڈ کراس کے ذریعے 120 فلسطینیوں کی لاشیں حوالے کی ہیں جن میں سے بیشتر کی حالت نہایت ابتر تھی اور ان پر قتل اور تشدد کے واضح آثار موجود تھے۔ اسماعیل ثوابتہ کے مطابق کئی لاشوں کی آنکھوں پر پٹیاں بندھی ہوئی تھیں اور ان کے ہاتھ پاؤں بھی بندھے ہوئے تھے جبکہ بعض کے گلے پر رسی کے نشانات تھے جو گلا گھونٹ کر قتل کیے جانے کی نشاندہی کرتے ہیں۔
انہوں نے مزید انکشاف کیا کہ متعدد لاشوں کے اعضا غائب تھے، جن میں آنکھیں، قرنیے اور دیگر انسانی اعضا شامل ہیں۔ یہ اس بات کا ثبوت ہے کہ اسرائیلی فوج نے فلسطینیوں کے جسموں سے اعضا چوری کیے جو ایک وحشیانہ جرم ہے۔ فلسطینی حکام نے عالمی برادری اور انسانی حقوق کی تنظیموں سے مطالبہ کیا ہے کہ وہ فوری طور پر ایک بین الاقوامی تفتیشی کمیٹی قائم کریں تاکہ اسرائیل کو شہدا کے جسموں کی بے حرمتی اور اعضا کی چوری جیسے سنگین جرائم پر جوابدہ ٹھہرایا جاسکے۔
