اسلام آباد(کھوج نیوز) اردن کے فرمانروا شاہ عبداللہ دوم پاکستان کے 2روزہ دورے پر اسلام آباد پہنچ گئے، پاکستانی فضائی حدود میں آمد پر پاک فضائیہ کے طیاروں نے شاہی طیارے کو حفاظتی حصار فراہم کیا۔
تفصیلات کے مطابق اردن کے فرمانروا شاہ عبد اللہ کی آمد پر صدر مملکت آصف زرداری اور وزیر اعظم شہباز شریف نے نور خان ائیربیس پر گرم جوشی سے ان کا استقبال کیا۔ وفاقی وزراء ، خاتون اول آصفہ بھٹو زرداری اور چیئرمین پی پی پی بلاول بھٹو زرداری بھی اس موقع پر موجود تھے۔ شاہ عبداللہ وزیراعظم شہباز شریف کی دعوت پر پاکستان کا 2 روزہ سرکاری دورہ کر رہے ہیں۔ شاہ عبداللہ ائیرپورٹ سے وزیر اعظم ہاؤس پہنچے جہاں انہیں گارڈ آف آنر دیا گیا۔
ترجمان دفتر خارجہ کے مطابق شاہ عبداللہ کا دورہ دونوں ملکوں کے برسوں پر محیط برادرانہ تعلقات کا عکاس ہے، دورے سے پاکستان اردن تعلقات کی اسٹریٹجک سمت مزید مضبوط ہوگی۔ترجمان دفتر خارجہ کے مطابق دورے کے دوران شاہ عبداللہ صدر اور وزیراعظم سے ملاقاتیں کریں گے، ایوان صدر میں شاہ عبداللہ کو پاکستان کا اعلی ترین سول ایوارڈ دیا جائیگا۔
