ممبئی (شوبز ڈیسک) اداکار ستیش شاہ کی موت کا اصل معاملہ کیا تھا؟ اس حوالے سے ساتھی اداکار راجیش کمار نے بڑا راز فاش کر کے شوبز انڈسٹری سمیت مداحوں میں ایک نئی ہلچل مچا دی ہے۔
انٹرنیشنل میڈیا کے مطابق معروف بھارتی اداکار ستیش شاہ 26 اکتوبر کو 74 برس کی عمر میں دنیا سے رخصت ہو گئے، جس پر بھارتی شوبز انڈسٹری اور ان کے مداح گہرے صدمے میں ہیں۔ ابتدائی رپورٹس میں یہ دعویٰ کیا جا رہا تھا کہ ستیش شاہ کا انتقال گردے فیل ہونے کے باعث ہوا، تاہم ڈرامہ سیریل ‘سارابھائی vs سارا بھائی’ کے ساتھی اداکار راجیش کمار نے اس کی تردید کر دی اور موت کی اصل وجہ بتا دی ۔
راجیش کمار نے کہا کہ گزشتہ 24 گھنٹے ہمارے لیے بہت جذباتی رہے، میں صرف ایک بات کی وضاحت کرنا چاہتا ہوں کہ ستیش جی کا انتقال گردے فیل ہونے کے باعث نہیں ہوا۔ ہاں، انہیں گردوں کا مسئلہ ضرور تھا لیکن وہ کنٹرول میں تھا۔ موت کی اصل وجہ اچانک ہارٹ اٹیک تھا۔ راجیش کے مطابق ستیش شاہ اپنے گھر میں دوپہر کے کھانے کے دوران اچانک دل کا دورہ پڑنے سے انتقال کر گئے۔
