کوئٹہ ریلوے اسٹیشن پردھماکا،وزیرداخلہ محسن نقوی وزیراعلیٰ بلوچستان کےہمراہ اسپتال پہنچ گئے

کوئٹہ(کھوج نیوز)کوئٹہ ریلوے اسٹیشن پر دھماکا،وزیرداخلہ محسن نقوی وزیراعلیٰ بلوچستان کے ہمراہ اسپتال پہنچ گئے۔رپورٹ کے مطابق وفاقی وزیر داخلہ محسن نقوی اور وزیر اعلی بلوچستان سرفراز بگٹی نے سول اسپتال کوئٹہ کا دورہ کیا، جہاں انہوں نے گزشتہ روز کوئٹہ ریلوے اسٹیشن پر ہوئے دھماکے کے زخمیوں کی عیادت کی۔اس موقع پر وفاقی وزیر داخلہ محسن نقوی اور وزیر اعلی بلوچستان سرفراز بگٹی نے اس ہولناک سانحہ میں زخمی ہونے والوں کے بلند حوصلے کو سراہا۔وفاقی وزیر داخلہ نے اسپتال کے دورے کے دوران متعلقہ ڈاکٹرز سے زخمیوں کی صحت کے حوالے سے بات چیت کی، اس کلے علاوہ انہوں نے زخمیوں کی جلد صحتیابی کے لیے دعا بھی کی۔
زخمیوں کی عیادت کے موقع پر وفاقی وزیر داخلہ نے زخمیوں سے کہا کہ پوری قوم آپ کے ساتھ ہے اور آپ کی جلد صحتیابی کے لیے دعا گو ہے، آپ کے علاج معالجے میں کوئی کسر نہیں چھوڑی جائے گی۔
اس موقع پر وفاقی وزیر داخلہ کے ہمراہ موجود وزیراعلی بلوچستان سرفراز بگٹی نے ڈاکٹرز کو زخمیوں کے بہترین علاج سے متعلق ہدایات دیں اور ایک زخمی شخص کو فوری طور پر کراچی شفٹ کرنے کا حکم دیا۔یاد رہے کہ گزشتہ روز کوئٹہ ریلوے اسٹیشن ہونے والے خودکش دھماکے میں خاتون سمیت 27 افراد جاں بحق اور 40 افراد زخمی ہو گئے تھے۔