پی ٹی آئی کے 24نومبر احتجاج کیخلاف اسلام آباد ہائیکورٹ نے کیا فیصلہ سنایا؟ تفصیل آگئی

اسلام آباد(کھوج نیوز) پاکستان تحریک انصاف کی طرف سے 24نومبر کو احتجاج کا اعلان کرنے کے خلاف اسلام آباد ہائیکورٹ نے کیا فیصلہ سنایا؟ اس حوالے سے تمام تفصیل سامنے آگئی ہے۔

تفصیلات کے مطابق اسلام آباد ہائی کورٹ نے پاکستان تحریک انصاف (پی ٹی آئی) کے 24 نومبر کے احتجاج کے خلاف درخواست پر فیصلہ سناتے ہوئے احتجاج کے تناظر میں نئے قانون کی خلاف ورزی میں احتجاج ، ریلی یا دھرنے کی اجازت نہ دینے کا حکم دے دیا۔ اسلام آباد ہائی کورٹ نے پاکستان تحریک انصاف کے 24 نومبر کے ا حتجاج کے خلاف درخواست پر فیصلہ سنا دیا۔ اسلام آباد ہائی کورٹ نے اپنے فیصلے میں کہا کہ امن قائم رکھنے کیلئے انتظامیہ قانون کے مطابق تمام اقدامات کرے۔انتظامیہ کی ذمہ داری ہے کہ قانون کے خلاف ورزی نہ ہونے دی جائے، یقینی بنایا جائے کہ شہریوں کے کاروبار زندگی میں کوئی رخنہ نہ پڑے۔

عدالتی فیصلے میں کہا گیا ہے کہ پبلک آرڈر 2024ء دھرنے، احتجاج، ریلی وغیرہ کی اجازت کیلئے مروجہ قانون ہے، اسلام آباد انتظامیہ مروجہ قانون کے خلاف دھرنا، ریلی یا احتجاج کی اجازت نہ دے۔ عدالت نے سیکرٹری داخلہ کو وزیر داخلہ یا کسی متعلقہ شخص کی سربراہی میں کمیٹی تشکیل دینے کا حکم دیا۔ عدالت نے کہا کہ کمیٹی میں چیف کمشنراسلام آباد کو بھی شامل کیا جائے۔ عدالت نے کمیٹی کو پی ٹی آئی کی قیادت کے ساتھ رابطہ کرنے کا بھی حکم دیا۔ اسلام آباد ہائیکورٹ نے حکم دیا کہ کمیٹی پی ٹی آئی قیادت کو بیلاروس کے صدر کے دورے کی حساسیت سے آگاہ کرے، عدالت کو یقین ہے جب یہ رابطہ ہوگا تو کچھ نا کچھ پیشرفت ہوگی۔