یو اے ای کے خلا باز نے مکہ مکرمہ کی خلاء سے کھینچی گئی تصویر سوشل میڈیا پر شیئر کر دی

یو اے ای(مانیٹرنگ ڈیسک) میدان عرفات میں حج کا رکن اعظم وقوف عرفہ آج اداکیا گیا اور حجاج کرام نے مسجد نمرہ سے خطبہ حج سننے کے بعد ظہر و عصر کی نمازیں یکجا کرکے ایک ساتھ ادا کیں۔

انٹرنیشنل میڈیا کے مطابق وقوف عرفہ کے موقع پر انٹرنیشنل اسپیس اسٹیشن (آئی ایس ایس)میں موجود متحدہ عرب امارات (یو اے ای)کے خلا باز سلطان النیادی نے مکہ مکرمہ کی خلا سے کھینچی گئی تصویر ٹوئٹر پر شیئر کی ۔ انہوں نے تصویر شیئر کرتے ہوئے لکھا کہ مکہ مکرمہ کی یہ تصویر انہوں نے 26 جون کو کھینچی تھی۔ مناسک حج کے دوران دنیا بھر سے آئے لاکھوں عازمین لبیک اللھم لبیک کی صدائیں بلند کرتے حج کے رکن اعظم وقوف عرفہ ادا کرنے کے لیے 9 ذوالحج کو نماز فجرکی ادائیگی کے بعد میدان عرفات میں جمع ہوئے تھے۔ اذان مغرب کے بعد عازمین میدان عرفات سے مزدلفہ روانہ ہوں گے جہاں وہ نماز مغرب اور عشا ملا کرادا کریں گے۔ خیال رہے کہ سلطان النیادی اس وقت بین الاقوامی اسپیس اسٹیشن میں ناسا کے 6 ماہ طویل مشن پر موجود ہیں اور وہیں سے وہ اپنے ٹوئٹر اکانٹ سے باقاعدہ اپ ڈیٹس شیئر کرتے رہتے ہیں۔ اس سے قبل رمضان کی27 ویں شب کے موقع پر سلطان النیادی نے اپنے آفیشل ٹوئٹر اکانٹ پر خلا سے مسجد الحرام اور مسجد نبوی کے مناظر شیئر کیے تھے۔ سلطان النیادی کی جانب سے شیئر کی گئی ویڈیو میں دونوں مقدس مقامات کو رات کی تاریکی میں جگمگاتے ہوئے دکھایا گیا تھا۔