روسی قونصل خانہ پر حملہ، کوئی جانی نقصان نہیں ہوا

فرانس (مانیٹرنگ ڈیسک) فرانس کے جنوبی شہر مارسلی میں واقع روسی قونصل خانہ پر دھماکہ خیز مواد سے حملہ کیا گیا جس میں تاحال کسی جانی نقصان کی اطلاع نہیں ملی، پولیس نے کارروائی شروع کر دی۔

انٹرنیشنل میڈیا کے مطابق پولیس کا مؤقف ہے کہ پیر کے روز قونصل خانے کے احاطے میں دھماکہ خیز مواد سے بھری 3 بوتلیں پھینکی گئیں جن میں سے 2 دھماکے سے پھٹ گئیں۔ پولیس کا کہنا ہے کہ یہ بوتلیں قونصل خانے کے باغیچے میں گریں اور ماہرین ان کے مواد کا تجزیہ کر رہے ہیں۔ اس واقعے کے بعد قونصل خانے کے عملے کو کچھ دیر کے لیے عمارت کے اندر ہی رہنے کی ہدایت کی گئی اور اس دوران بم ڈسپوزل اسکواڈ نے علاقے کا معائنہ کیا۔ روسی قونصل خانے پر ہونے والے اس حملے میں کسی جانی نقصان کی اطلاع نہیں ملی۔

روس نے اس حملے کو دہشت گردی قرار دیتے ہوئے فرانس سے سکیورٹی اقدامات کے حوالے سے وضاحت طلب کی ہے، روس کے مطابق روسی حکام نے فرانس سے مکمل تحقیقات کا مطالبہ بھی کیا ہے۔ یہ واقعہ ایسے وقت میں پیش آیا جب یوکرین پر روسی حملے کو آج 3 سال مکمل ہو رہے ہیں۔ روسی وزارت خارجہ کی ترجمان نے کہا کہ مارسیلی میں روسی قونصل خانے کے احاطے میں ہونے والے دھماکے میں دہشت گردی کے تمام آثار موجود ہیں۔ فرانسیسی حکام نے تحقیقات کا آغاز کر دیا ہے تاہم اس حملے کے پس پردہ مقاصد اور ملزمان کے بارے میں ابھی تک کوئی تفصیلات سامنے نہیں آئیں۔