طالبان حکومت کا بڑا کارنامہ، مقامی تیار کردہ بس اور کار نمائش کیلئے پیش کر دی

کابل (مانیٹرنگ ڈیسک) افغانستان میں طالبان حکومت کا بڑا کارنامہ سامنے آگیا ہے جس میں طالبان حکومت نے مقامی تیار کردہ بس اور کار نمائش کے لئے پیش کر دی ہے۔

انٹرنیشنل میڈیا کے مطابق گزشتہ روز کابل میں افغانستان کے نائب وزیر اعظم برائے اقتصادی امور ملا عبدالغنی برادر اورنائب وزیر اعظم برائے انتظامی امور مولوی عبدالسلام حنفی نے صنعتی فیکٹریوں کے کمپلیکس کا افتتاح کیا۔

اس حوالے سے افغان حکومت نے کہا کہ یہ کمپلیکس اِس وقت 105 اقسام کی مختلف مصنوعات تیار کر رہا ہے جن میں زرعی مشینری، آلات، چھوٹے صنعتی فیکٹریوں کے لیے پرزہ جات، ٹرانسپورٹ گاڑیاں اور دیگر اشیا شامل ہیں۔ افتتاحی تقریب کے دوران نیشنل ڈیویلپمنٹ کارپوریشن کمپلیکس کی تیار کردہ کئی مصنوعات کی نمائش بھی کی گئی۔ اس نمائش میں مقامی طور پر تیار کردہ بس اور کار بھی رکھی گئی۔ ملک میں تیار کردہ بس میں افغان کابینہ ارکان نے سفر بھی کیا۔

افغان حکومت اور افغان طالبان کے ترجمان ذبیح اللہ مجاہد نے بس کی تصاویر ایکس پر پوسٹ کیں اور لکھاکہ کچھ دن قبل میں نے اعلان کیا کہ افغانستان نے اپنی پہلی قومی بس بنائی ہے جس پر بہت سے لوگوں نے تبصرے کیے، کچھ نے کہا کہ تصویر کسی اور کمپنی کی ہے، کچھ نے اسے پروپیگنڈا قرار دیا۔ ان کا کہنا تھاکہ میں نے گزشتہ رات اسی قومی بس میں سواری کی اور میں نیشنل بس کمپنی کا اپنے وعدے کو پورا کرنے پر شکریہ ادا کرتا ہوں۔