ایف بی آر کی ٹیموں کو شوگر ملوں کے گیٹ پر کھڑے ہونے کی نوکری مل گئی

اسلام آباد(سٹاف رپورٹر، مانیٹرنگ ڈیسک) حکومت نے چینی قیمتوں میں اضافہ پر کارروائی کا فیصلہ کرتے ہوئے ایف بی آر کی ٹیموں کو شوگر ملوں کے گیٹ پر تعیناتی کی منظوری دے دی۔

تفصیلات کے مطابق ذرائع وزارت فوڈ سکیورٹی کا کہنا تھا کہ تمام شوگر ملوں کے گیٹ پر ایف بی آرنے ٹیمیں تعینات کردیں ہیں اور وزارت خزانہ نے اسمگلروں کے خلاف کارروائیاں بھی شروع کردی ہیں۔ ذرائع کا کہنا ہے کہ افغانستان اور ایران کی سرحدوں پر بھی چیکنگ بڑھادی گئی ہے اور سرحدوں پر اسمگلروں کی نقل وحرکت روکنے کیلئے خفیہ اداروں کی مدد لی جارہی ہے۔ وزارت فوڈسکیورٹی نے ہدایت کی ہے کہ صوبے چینی کی ذخیرہ اندوزی روکنے کیلئے خصوصی ٹاسک فورس بنائیں اور ناجائز منافع خوروں کیخلاف بھی کارروائیاں تیز کریں۔

دوسری جانب ایف بی آر نے اشیا کی غیرقانونی نقل وحمل اوراسمگلنگ روکنے کیلئے آزادکشمیرکوپاکستان سے ملانے والی 2شاہراہوں پر چوکیاں قائم کرلی ہیں۔ ایف بی آر نے کوہالہ پل اورمنگلہ پل پرچیک پوسٹیں قائم کیں اور چیک پوسٹوں کے قیام سے متعلق نوٹیفکیشن بھی جاری کردیاگیا۔ ایف بی آر کے مطابق کوہالہ پل پر قائم چیک پوسٹ کو 2 موبائل ٹیموں کی سہولت ہوگی، کوہالہ پل چیک پوسٹ کادائرہ اختیار مری ایکسپریس وے، جی ٹی روڈ اوربھوربن روڈ سے بارہ کہو تک ہے۔ ایف بی آر نے بتایاکہ میرپورکوپنجاب سے ملانے والی منگلہ روڈ پر ناکودارچیک پوسٹ قائم کی گئی جس کا دائرہ اختیار منگلا روڈ، دینہ بائی پاس، جی ٹی روڈجہلم اورکلرسیداں کی طرف دھان گلی تک ہوگا، ناکودارچیک پوسٹ کو ایک موبائل ٹیم کی بھی خدمات حاصل ہونگی۔