اپنی چھت اپنا گھر پروگرام کی منظوری، پروگرام کی لانچنگ 14اگست کو ہوگی
ڈاکٹرز کو نائٹ ڈیوٹی پر 7 ہزار، ساڑھے 7 ہزار اور 8ہزار تک نائٹ الاؤنس جبکہ دور دراز علاقوں میں تعینات ڈاکٹرز کیلئے ایک ہزار روپے پیٹرول الاؤنس دینے پر اتفاق
لاہور(کھوج نیوز) پنجاب حکومت نے اپنی چھت اپنا گھر پروگرام کی منظوری دے دی ، وزیراعلی مریم نواز کی زیر صدارت پروگرام کی لانچنگ 14 اگست کو ہوگی’ ڈاکٹرز کیلئے الائونس بڑھا دیا گیا۔
تفصیلات کے مطابق وزیراعلی مریم نوازکی زیر صدارت صوبائی کابینہ کا اجلاس ہوا جس میں اپنی چھت اپناگھر پروگرام کی منظوری دی گئی۔ اس کے علاوہ اجلاس میں ڈاکٹرزکے لیے الاؤنس بڑھانے اور وزیراعلی پنجاب کسان کارڈ کی بھی منظوری دی گئی۔ ڈاکٹرز کو نائٹ ڈیوٹی پر 7 ہزار، ساڑھے 7 ہزار اور 8ہزار تک نائٹ الاؤنس ملے گا جبکہ دور دراز علاقوں میں تعینات ڈاکٹرز کے لیے روز ایک ہزار روپے پیٹرول الاؤنس دینے پر اتفاق کیا گیا ہے۔ اجلاس میں پنجاب سکھ آنند کراج میرج رجسٹرار رولز 2024 اور پنجاب سکھ آنند کراج میرج رولز 2024کی منظوری دی گئی جبکہ داتا دربار آئی اسپتال کا انتظام دوبارہ پرائمری اینڈ سکینڈری ہیلتھ کے سپرد کر دیا گیا۔ کابینہ نے کاشت کاروں کے لیے وزیراعلی مریم نوازشریف کے اقدامات کو سراہا۔ اجلاس میں اوور سیز پاکستانیوں کو جائیداد کی منتقلی اور ریوینیو سروسز کے لیے رجسٹریشن ایکٹ 1908 میں ترامیم کی منظوری دی گئی۔ اس کے علاوہ چنگ چی او رکشے کو بتدریج متبادل ماحول دوست ٹرانسپورٹ پر منتقل کرنے اور اسموگ کے خاتمے کے لیے موٹرسائیکل کے لیے فٹنس سرٹیفکیٹ کے حصول پر اتفاق کیا گیا۔ وزیراعلی مریم نوازشریف نے موٹرسائیکل فٹنس سرٹیفکیٹ کا طریقہ کار آسان بنانے کی ہدایت کی۔ اجلاس میں یتیم طلبا کو الیکٹرک بائیک دینے کے لیے طریقہ کار کی منظوری بھی گئی اور وزیراعلی نے یتیم طلبا و طالبات کو الیکٹرک بائیک دینے کے لیے پراسس جلد مکمل کرنے کی ہدایت کی۔ وزیراعلی مریم نوازکی زیر صدارت صوبائی کابینہ کے اجلاس میں ریٹائرمنٹ کے بعد ملازمین کے سرکاری گھر کی الاٹمنٹ میں توسیع نہ کرنے کا فیصلہ کیا گیا، کابینہ نے الاٹمنٹ میں توسیع کے اختیارات سرنڈر کر دیے۔ اس کے علاوہ تمام محکموں کے لائبریرین کو ماسٹر ڈگری حاصل کرنے پر 17 گریڈ دینے کی منظوری بھی دی گئی۔
