خیبرپختونخوا میں اب تک چیف سیکرٹری کی تعیناتی کیوں نہ ہوسکی؟ شہباز شریف نے اصل وجہ بتا دی

اسلام آباد(کھوج نیوز) خیبرپختونخوا میں ابک تک چیف سیکرٹری کی تعیناتی کیوں نہ ہوسکی؟ اس حوالے سے وزیراعظم میاں شہبازشریف قومی اسمبلی میں خطاب کرتے ہوئے اصل وجہ بتا دی ہے۔

تفصیلات کے مطابق وزیراعظم میاں شہباز شریف نے قومی اسمبلی میں خطاب کرتے ہوئے کہا کہ خیبر پختونخوا میں اب تک چیف سیکرٹری کی تعیناتی نہ ہونے کا ذمہ دار صوبائی حکومت ہے۔ انہوں نے کہا کہ دہشت گردی کے خلاف خیبرپختونخوا کے عوام نے سب سے زیادہ قربانیاں دی ہیں، دہشت گردی کا شکار ہونے کی وجہ سے کے پی کو 590 ارب روپے دیے گئے لیکن اب تک صوبے میں سی ٹی ڈی کا ادارہ صوبے میں مکمل نہیں ہو سکا۔

ان کا مزید کہنا تھاکہ چیف سیکرٹری خیبر پختونخوا کی تعیناتی کیلئے 3 ناموں کا پینل بھجوایا گیا ہے لیکن ان کی تعیناتی سے متعلق صوبائی حکومت کی جانب سے کوئی جواب نہیں آیا، اگر اس پینل میں شامل نام منظور نہیں تو آگاہ کریں ہم نیا پینل بھیج دیں گے۔انہوں نے کہا کہ خیبرپختونخوا کی طرح دیگر صوبوں نے بھی دہشت گردی کا سامنا کیا،بلوچستان سمیت دیگر صوبوں نے بھی بڑی قربانیاں دیں تاہم انہیں کچھ نہیں ملا۔