پی ٹی آئی کا قومی اسمبلی کے 37 اراکین کے نام الیکشن کمیشن میں جمع کرانےکا اعلان
بیرسٹر گوہر علی خان نےپارلیمنٹ ہاؤس کے باہر میڈیا سے بات کرتے ہوئے مطالبہ کیا ہے کہ الیکشن کمیشن فوری طور پر پی ٹی آئی اراکین کے نوٹی فکیشن جاری کرے
اسلام آباد(کھوج نیوز)پی ٹی آئی کا قومی اسمبلی کے 37 اراکین کے نام الیکشن کمیشن میں جمع کرانےکا اعلان۔رپورٹ کے مطابق پاکستان تحریکِ انصاف نے سپریم کورٹ کے حالیہ فیصلے کی روشنی میں پارٹی میں شامل ہونے والے قومی اسمبلی کے 37 آزاد اراکین کے نام آج ہی الیکشن کمیشن کو فراہم کرنے کا اعلان کیا ہے۔ چیئرمین پی ٹی آئی بیرسٹر گوہر علی خان نےپارلیمنٹ ہاؤس کے باہر میڈیا سے بات کرتے ہوئے مطالبہ کیا ہے کہ الیکشن کمیشن فوری طور پر پی ٹی آئی اراکین کے
نوٹی فکیشن جاری کرے۔ سپریم کورٹ نے 12 جولائی کو مخصوص نشستوں سے متعلق اپنے فیصلے میں قرار دیا تھا کہ قومی اسمبلی کے 41 اراکین اپنی پارٹی وابستگی سے متعلق 15 روز میں حلف نامے جمع کرائیں۔ پی ٹی آئی کا دعویٰ ہے کہ تمام 41 ارکان سے پارٹی میں شمولیت کے حلف نامے لے لیے گئے ہیں جن میں سے 37 کی تصدیق آج الیکشن کمیشن میں کر دی جائے گی۔
سپریم کورٹ کے فیصلے پر مشاورت کے لیے جمعرات کو پارلیمنٹ ہاؤس میں پی ٹی آئی اور سنی اتحاد کونسل کے پارلیمانی رہنماؤں کا مشترکہ اجلاس ہوا جس میں سپریم کورٹ کے فیصلے اور آئندہ کی حکمتِ عملی پر تبادلۂ خیال کیا گیا۔
