صحافی ملک حسن زیب کو قتل کیوں کیا گیا تھا؟ قاتل کون تھے؟ سچائی سامنے آگئی

پشاور (کھوج نیوز) نوشہرہ میں قتل کیے جانے والے صحافی ملک حسن زیب کو قتل کیوں کیا گیا تھا؟اور اس کے قاتل کون تھے ؟ اس حوالے سے پولیس نے تفتیش مکمل کرتے ہوئے سچائی سامنے رکھ دی ہے۔

تفصیلات کے مطابق ڈی پی او نوشہرہ نے بتایا ہے کہ مقتول حسن زیب کے کاروباری لین دین کے معاملات زیادہ تھے، حسن زیب موبائل فون، الیکٹرونکس اور موٹرسائیکلیں قسطوں پر فروخت کرتا تھا جب کہ صحافی حسن زیب کو پلاٹ کے ذاتی لین دین کے تنازع پرقتل کیا گیا۔ ڈی پی او کا کہنا تھا کہ پولیس نے صحافی ملک حسن زیب کے قتل کیس کو 10دن میں نمٹادیا ہے، گرفتار ملزمان کا دو روزہ جسمانی ریمانڈ حاصل کرلیا ہے۔

ڈی پی نوشہرہ کے مطابق قتل میں نامزد دونوں ملزمان اشفاق اوراس کے بیٹے کو گرفتار کرلیاگیاہے جب کہ ملزمان نے اعتراف جرم بھی کرلیاہے، دوران تفتیش ملزمان نے پولیس کو بتایا کہ مقتول کی پہلی بیوی کا بھائی بلال بھی قتل میں ملوث ہے، ملزم بلال نے اجرتی قاتل کی سہولت فراہم کی، اجرتی قاتل کوایک لاکھ روپے دیے گئے،پولیس نے بلال اور اجرتی قاتل کی تلاش شروع کردی ہے۔ڈی پی او نے بتایا کہ صحافی نے37 لاکھ روپے میں ملزمان کوپلاٹ فروخت کیا تھا، رقم ادائیگی میں تاخیر پر نوبت لڑائی جھگڑے تک جاپہنچی جس کے بعد لڑائی جھگڑے، گالم گلوچ اوردھمکیوں کی رنجش پرحسن زیب کوقتل کردیا گیا۔