موجیں ختم… بیورو کریٹس، ججز اور پارلیمنٹرینز سمیت سب کی مفت بجلی بند

اسلام آباد(کھوج نیوز) وزارت توانائی نے انڈیپنڈنٹ پاور پروڈیوسرز (آئی پی پیز) کے خلاف ملک گیر آگاہی مہم کے بعد ایمرجنسی پلان تیار کرلیا جس میں بیوروکریٹس ، ججز اور پارلیمنٹرینز سمیت سب کی موجیں ختم ہو جائیں گی۔

تفصیلات کے ذرائع نے بتایا ہے کہ تمام سرکاری، نیم سرکاری اداروں میں مفت بجلی کی سہولت ختم کرنے کی تجویز دی گئی ہے جبکہ بیوروکریٹس، ججز اور پارلیمنٹرینز سمیت سب کی مفت بجلی بند کرنے کی بھی تجویز ہے۔ذرائع انرجی ڈویژن نے بتایاکہ دوسرے مرحلے میں مفت پیٹرول کی سہولت بھی واپس لینے کی تجویز دی گئی ہے۔ذرائع انرجی ڈویژن کا کہنا ہے کہ نیپرا اور اوگرا کی کارکردگی بھی جانچے کا فیصلہ کیا گیا ہے۔ ذرائع کا کہنا ہے کہ ملک اس وقت شدید مالی دباو اور بیرونی قرضوں تلے دبا ہوا، انقلابی اقدامات سے ہی مستقل ڈیفالٹ سے بچا جا سکتا ہے، برآمدات 60 ارب ڈالر لے جانا ناگزیر ہو گیا۔ذرائع انرجی ڈویژن کے مطابق صرف انڈسٹری اور کاروبار کو جائز سہولتیں دی جائیں گی جبکہ فیکٹریوں میں ایم ڈی آئی چارجز کو کم کرنے کی تجویز بھی زیر غور ہے۔