اسرائیل نے جو مسلمانوں کی نسل کشی کی ہے اس کا خمیازہ بھگتنا پڑے گا: شہباز شریف کا دو ٹوک مؤقف

اسلام آباد(کھوج نیوز) وزیراعظم شہباز شریف نے دو ٹوک مؤقف لیتے ہوئے کہا کہ اسرائیل نے غزہ میں جو مسلمانوں کی نسل کشی کی ہے اس حوالے سے اس کو خمیازہ بھگتنا پڑے گا۔

تفصیلات کے مطابق وزیراعظم شہباز شریف نے کہا ہے کہ عالمی برادری اسرائیل کے جنگی جرائم کا محاسبہ کرتے ہوئے اسے انصاف کے کٹہرے میں کھڑا کرے۔ وزیراعظم شہباز شریف نے پاکستان کے میڈیکل کالجز میں فلسطین کے میڈیکل کے طلبا کے لیے خصوصی انتظام کرنے کی ہدایت کی تاکہ وہ اپنی تعلیم کا سلسلہ جاری رکھ سکیں۔ وزیراعظم نے کہا کہ خان یونس کے محاصرے سے علاقے میں اشیائے خور و نوش دیگر ضروریات زندگی کی فراہمی معطل ہو کر رہ گئی ہے، فلسطین میں انسانی المیہ جنم لے چکا ہے، فلسطین سے متعلق عالمی عدالتی انصاف کے فیصلے اور اقوام متحدہ کی قراردادوں پر عمل درآمد کروایا جائے۔ انہوں نے کہا کہ پاکستانی حکومت اور عوام فلسطینیوں کے ساتھ کھڑے ہیں ۔ پاک فضائیہ کے 6 جہازوں سے 1200 ٹن اور 3 بحری جہازوں کے ذریعے 1500 ٹن امدادی سامان فلسطین بھجوایا جا چکا ہے۔