فوجی اہلکاروں کو بغاوت پر اکسانے کا الزام، لیفٹیننٹ کرنل (ر) اکبر حسین کو سخت قید کی سزا
سابق میجر عادل فاروق راجہ اور سابق کیپٹن حیدر رضا مہدی کا بھی کورٹ مارشل ، دونوں کو آرمی ایکٹ کے تحت فوجی اہلکاروں کو بغاوت پر اکسانے کے الزام میں سزا سنائی گئی
راولپنڈی(کھوج نیوز) پاک فوج نے لیفٹیننٹ کرنل (ر) اکبر حسین کو فوجی اہلکاروں کو بغاوت پر اکسانے پر سزا سنادی ، سزا کے مطابق افسر کا رینک 26جولائی 2024ء کو ضبط کرلیا گیا تھا۔
پاک فوج کے شعبہ تعلقات عامہ (آئی ایس پی آر) کے مطابق ایک ریٹائرڈ افسر لیفٹیننٹ کرنل اکبر حسین کا فیلڈ جنرل کورٹ مارشل کیا گیا تھا، لیفٹیننٹ کرنل اکبر حسین کو فوجی اہلکاروں کو بغاوت پر اکسانے کے الزام میں سزا سنائی گئی، اکبر حسین کو 10مئی2024ء کو 14 سال کی سخت قید کی سزا سنائی گئی تھی، مجاز عدالت نے مناسب عدالتی عمل کے ذریعے اکبر حسین کو ‘مجرم’ قرار دیا تھا۔
آئی ایس پی آر کے مطابق عادل راجہ اور حیدر رضا مہدی دونوں کا عہدہ بھی ضبط کیا گیا تھا، دونوں پر سزا کا اطلاق21 نومبر 2023ء سے ہوا تھا، دونوں کو ریاست کے تحفظ اور مفاد کے خلاف کام کرنے پر سزا سنائی گئی تھی۔ آئی ایس پی آر کا کہنا ہے کہ سزا کے مطابق افسر کا رینک 26 جولائی 2024ء کو ضبط کرلیا گیا ہے جب کہ سابق میجر عادل فاروق راجہ اور سابق کیپٹن حیدر رضا مہدی کا بھی کورٹ مارشل کیا گیا، دونوں کو آرمی ایکٹ کے تحت فوجی اہلکاروں کو بغاوت پر اکسانے کے الزام میں سزا سنائی گئی، عادل راجہ کو 14 اور حیدر رضا مہدی کو 12 سال قید بامشقت کی سزا سنائی گئی تھی۔
