برف پگھلنے لگی، عمران خان نے فوج کیساتھ مذاکرات کا اعلان کرکے سب کو حیران کر دیا

راولپنڈی (کھوج نیوز) برف پگھلنے لگی، پاکستان تحریک انصاف کے بانی عمران خان نے فوج کے ساتھ مذاکرات کا اعلان کرتے ہوئے کہا کہ فوج اپنا نمائندہ مقرر کے ہم مذاکرات کریں گے۔

تفصیلات کے مطابق 190ملین پائونڈ کیس کی سماعت کے دوران صحافیوں سے گفتگو کرتے ہوئے کہا کہ ہم فوج کے ساتھ مذاکرات کے لئے تیار ہیں فوج اپنا نمائندہ مقرر کرے۔ صحافی نے سوال پوچھا کہ آپ فوج پر الزامات لگاتے ہیں اور ان ہی سے مذاکرات بھی چاہتے ہیں، سیاسی جماعتوں سے مذاکرات کیوں نہیں کرتے؟ اس پر عمران خان نے جواب دیا ہم نے فوج پر الزامات نہیں لگائے بلکہ صرف تنقید کی، ایس آئی ایف سی کیا ہے اور محسن نقوی کون ہے؟ ملک میں غیر اعلانیہ مارشل لا ہے، محسن نقوی ان ہی کا تو نمائندہ ہے، وہ یہاں ان ہی کے ذریعے پہنچا ہے۔

صحافیوں نے عمران خان سے سوال کیا اگر وہاں سے محسن نقوی کو مذاکرات کا اختیار دیا جائے تو کیا آپ مذاکرات کریں گے؟ اس پر بانی پی ٹی آئی نے جواب دیا کہ محسن نقوی سے کبھی بات نہیں کروں گا، اس نے آئی جی پنجاب سے مل کر ہم پر ظلم کیا جب کہ مریم نواز بھی فاشسٹ ہے۔ عمران خان کا مزید کہنا تھا کہ مجھے جوڈیشل کمپلیکس سے اغوا کیا گیا تو چیف جسٹس عامر فاروق نے درست قرار دیا، جسٹس عامر فاروق سے گزارش ہے میرے مقدمات سے الگ ہو جائیں، ہائیکورٹ میں اور بھی ججز ہیں کسی اور کو کیسز دے دیں۔ بانی پی ٹی آئی نے کہا کہ9 مئی میں تحریک انصاف کا کوئی بندہ ملوث ہے تو اسے ضرور سزا دیں، حکومت کا ایک ہی مقصد ہے پی ٹی آئی اور فوج کو لڑوا کر ہماری جماعت ختم کروائیں۔