سکیورٹی فورسز کے خفیہ اطلاعات پر دو مختلف آپریشنز، 4خوارجی ہلاک

راولپنڈی (کھوج نیوز) سکیورٹی فورسز نے خفیہ اطلاعات پر دو مختلف آپریشن کیے جس میں 4خوارجی ہلاک ہو گئے ، پہلا آپریشن بنوں ضلع کے علاقہ جانی خیل میں انٹیلی جنس بنیادوں پر کیا گیا۔

تفصیلات کے مطابق پاک فوج کے ترجمان ادارے (آئی ایس پی آر) کی جانب سے جاری بیان میں بتایا گیا کہ بنوں ضلع کے علاقہ جانی خیل میں انٹیلی جنس بنیادوں پر آپریشن کیا گیا، اس دوران شدید فائرنگ کا تبادلہ ہوا جس میں دو خوارجی ہلاک کردیے گئے۔ آئی ایس پی آر کے مطابق مارے گئے خوارجیوں سے اسلحہ اور ہتھیار برآمد کرلئے گئے ہیں، خوارجی سکیورٹی فورسز کے خلاف دہشت گردی اور معصوم شہریوں کے ٹارگٹ کلنگ میں ملوث تھے ۔ آئی ایس پی آر کے مطابق دوسرا آپریشن شمالی وزیرستان کے علاقہ حسن خیل میں کیا گیا جس میں سیکیورٹی فورسز نے خوارجیوں کے ٹھکانوں کو کامیابی سے نشانہ بنایا، اور فائرنگ کے تبادلہ میں دو خوارجی مارے گئے۔