عدالت کا بڑا حکم، علی امین گنڈا پور کی مشکلات میں اضافہ

اسلام آباد(کھوج نیوز) ڈسٹرکٹ اینڈ سیشن کورٹ اسلام آباد نے ایسا حکم سنا دیا کہ وزیراعلیٰ خیبرپختونخوا علی امین گنڈا پور کی مشکلات میں اضافہ ہوا جس کے بعد ان کے وکلاء نے بھی سر جوڑ لیے ہیں۔

تفصیلات کے مطابق ڈسٹرکٹ اینڈ سیشن کورٹ اسلام آباد کے جوڈیشل مجسٹریٹ مبشرحسن کی عدالت میں علی امین گنڈاپور کے وکیل ظہور الحسن پیش ہوئے۔ اس موقع پر علی امین گنڈا پور کے گزشتہ وارنٹ گرفتاری کی بیلف رپورٹ عدالت میں پیش کی گئی جس کے مطابق علی امین گنڈاپور کے وارنٹ گرفتاری پر عمل درآمد نہیں ہوسکا۔ وارنٹ گرفتاری پر عملدرآمد کیلئے مزید مہلت کی استدعا کی گئی۔ عدالت طلبی کے باوجود وزیراعلیٰ خیبرپختونخوا علی امین گنڈاپور آج بھی عدالت پیش نہیں ہوئے۔ اس پرعدالت نے ان کے ناقابل ضمانت وارنٹ گرفتاری برقرار رکھے اور انہیں 23 اکتوبر تک گرفتار پیش کرنے کا حکم دے دیا۔