بانی پی ٹی آئی کی اہلیہ بشریٰ بی بی کےبعد ان کی بہنوں کو بھی آزادی کا پروانہ مل گیا

اسلام آباد(کھوج نیوز)بانی پی ٹی آئی عمران خان کی اہلیہ بشریٰ بی بی کے بعد ان کی بہنوں کو بھی آزادی کا پروانہ مل گیا۔رپورٹ کے مطابق اسلام آباد کی انسدادِ دہشت گردی کی عدالت نے علیمہ خان اور عظمیٰ خان کی رہائی کا حکم دے دیا۔ بانیٔ پی ٹی آئی کی بہن علیمہ خان اورعظمیٰ خان کے خلاف ڈی چوک احتجاج کیس کی سماعت جج ابو الحسنات ذوالقرنین نے کی۔ عدالت نے علیمہ خان اورعظمیٰ خان کی ضمانت کی درخواستیں منظورکرلیں۔ دونوں کی 20، 20 ہزار روپے کے مچلکوں کے عوض ضمانتیں منظورکی گئیں۔

بعدازاں انسداد دہشت گردی عدالت کے جج ابو الحسنات ذوالقرنین نے رہائی کی روبکار جاری کردی۔ واضح رہے کہ اسلام آباد کے تھانہ کوہسار کے مقدمے میں علیمہ خان اور عظمیٰ خان 4 اکتوبر سے گرفتار تھیں۔ یاد رہے کہ گزشتہ روز بانیٔ پی ٹی آئی کی اہلیہ بشریٰ بی بی کو بھی اڈیالہ جیل سے رہا کر دیا گیا تھا۔