رمضان شوگر مل کیس، شہباز شریف، حمزہ شہباز کیخلاف سماعت ملتوی

لاہور (کھوج نیوز) اینٹی کرپشن عدالت لاہور نے شہباز شریف اور حمزہ شہباز کیخلاف رمضان شوگر مل کیس کی سماعت 4دسمبر تک ملتوی کر تے ہوئے ریمارکس دیئے ہیں کہ ابھی دیکھنا ہے ریفرنس پر سماعت کا اختیار ہمارے پاس ہے یا نہیں۔

تفصیلات کے مطابق سینئر سپیشل جج اینٹی کرپشن سردارمحمد اقبال ڈوگر نے وزیراعظم شہباز شریف اور حمزہ شہباز کیخلاف جمع کرائے گئے نیب ریفرنس پر سماعت کی۔حمزہ شہباز نے عدالت کے روبرو پیش ہوکر حاضری مکمل کروائی جبکہ وزیر اعظم کی جانب سے نمائندے انوار حسین عدالت میں حاضر ہوئے۔ شہباز شریف اور حمزہ شہباز کے وکیل امجد پرویز نے نیب ترمیمی آرڈیننس کی کاپی عدالت میں پیش کرتے ہوئے کہا کہ نیب ترمیمی آرڈیننس کی روشنی میں اینٹی کرپشن ریفرنس پر سماعت کا دائرہ اختیار رکھتی ہے۔جج اینٹی کرپشن نے استفسار کیا کہ کیا اس ریفرنس میں فرد جرم عائد ہوچکی ہے؟،وکیل امجد پرویز نے کہا کہ اس میں فرد جرم عائد ہوچکی ہے اور 4گواہ بھی ہوئے ہیں۔ جج اینٹی کرپشن نے ریمارکس دیے کہ نیب عدالت کے فرد جرم کو ہم کیسے آگے چلا سکتے ہیں۔وکیل امجد پرویز نے کہا کہ میں اعلی عدالتوں کے فیصلوں کی نقول دیتا ہوں اس کے بعد عدالت نے فرد جرم عائد کرنی ہے تو کر سکتی ہے، حمزہ شہباز خود موجود ہیں اور شہباز شریف کے نمائندے کی موجودگی میں آپ فرد جرم عائد کر سکتے ہیں۔جج اینٹی کرپشن نے کہا کہ ابھی ہم نے دیکھنا ہے ریفرنس پر سماعت کا اختیار ہمارے پاس ہے یا نہیں، عدالت نے عدالتی دائرہ اختیار کا جائزہ لینے کیلئے کارروائی کچھ دیر کیلئے ملتوی کر دی۔بعد ازاں کیس کی سماعت 4دسمبر تک ملتوی کر دی گئی۔