بھارت سے تعلقات کیسے ٹھیک ہو سکتے ہیں؟ نوازشریف نے حیران کر دینے والا بیان داغ دیا
بھارت کے ساتھ اگر ماضی میں تعلقات بگڑے ہیں تو انہیں سنوارنے کی ضرورت ہے، اور اس کے لیے مجھے کوئی مشکل نظر نہیں آتی: میاں نوازشریف
لاہور(کھوج نیوز) بھارت سے تعلقات کیسے ٹھیک ہو سکتے ہیں ؟ اس حوالے سے پاکستان مسلم لیگ ن کے صدر و سابق وزیراعظم میاں نوازشریف نے حیران کر دینے والا بیان داغ دیا ہے۔
تفصیلات کے مطابق مسلم لیگ ن کے صدر میاں نوازشریف کا کہنا تھا کہ بھارت کی ٹیم کو چیمپیئنز ٹرافی کھیلنے کے لیے پاکستان ضرور آنا چاہیے، ہم ہر ملک کے ساتھ اچھے تعلقات چاہتے ہیں۔ صدر ن لیگ نے کہاکہ 6 سے 7 سال بعد پاکستان میں اب دوبارہ ترقی ہورہی ہے۔ انہوں نے کہاکہ مجھے بھارت کے ساتھ تعلقات سنوارنے میں کوئی مشکل نظر نہیں آتی، پاکستان کے تمام ہمسایوں کے ساتھ اچھے تعلقات ہونے چاہییں۔ پاکستان کے امریکا کے ساتھ اچھے تعلقات رہے اور رہنے چاہئیں۔ انہوں نے کہاکہ اچھا ہوتا کہ بھارتی ٹیم چیمپیئنز ٹرافی میں پاکستان آکر کھیلتی، امید ہے جلد ایسا وقت آئے گا۔انہوں نے کہاکہ پاکستان کی معیشت میں بہتری آنا شروع ہوگئی ہے اور مہنگائی مسلسل نیچے آرہی ہے۔ وزیراعلی پنجاب مریم نواز نے سب سے پہلے آٹے اور روٹی کی قیمتیں کم کرنے کے لیے اقدامات کیے، معیشت کی بہتری کے لیے شہباز شریف نے بے پناہ اقدامات کیے ہیں۔ صدر مسلم لیگ ن نے کہاکہ پاکستان تحریک انصاف نے ملک میں بدتمیزی کے کلچر کی بنیاد رکھ دی ہے، کوئی ایک منصوبہ بتایا جائے جو پی ٹی آئی نے اپنے دور حکومت میں دیا ہو۔
