پی ٹی آئی کا احتجاجی مارچ، اسلام آباد پولیس مظاہرین سے کیسے نمٹے گی؟ منصوبہ سامنے آگیا

اسلام آباد(کھوج نیوز) پاکستان تحریک انصاف کا احتجاجی مارچ روکنے اور مظاہرین سے نمٹنے کے لئے اسلام آباد کی پولیس کیا کرنے والی ہے؟ تمام منصوبہ سامنے آگیا ہے۔

تفصیلات کے مطابق اسلام آباد پولیس نے اہلکاروں کی چھٹیاں منسوخ کردی ہیں اور چھٹی پر گئے اہلکاروں کو واپس بلا لیا گیا ہے۔ تمام ایس ایچ اوز کو نفری فراہمی کی لسٹیں بھی مرتب کرلی گئی ہیں۔ ایف سی اور دیگر صوبوں کی نفری بھی 21 نومبر کو اسلام آباد پہنچ جائے گی۔ پی ٹی آئی کے احتجاج سے نمٹنے کے لیے اسلام آباد کے گردونواح میں کنٹینرز پہنچانے کا کام بھی شروع ہوگیا ہے۔

میڈیا رپورٹس کے مطابق، اسلام آباد پولیس نے بھاری نفری طلب کرنے کے علاوہ 40 ہزار آنسو گیس شیلز اور 2 ہزار ٹیئر گیس شیل منگوانے کا فیصلہ کیا ہے۔ اس کے علاوہ 2500 بندوقوں کے ساتھ 50 ہزار ربڑ کی گولیاں اور 5 ہزار اینٹی رائٹس کٹس بھی منگوائی جارہی ہیں۔ اسلام آباد میں مظاہرین سے نمٹنے کے لیے اسلام آباد پولیس، رینجرز، ایف سی، پنجاب اور سندھ پولیس کے 22 ہزار جوان وفاقی دارالحکومت میں تعینات ہوں گے۔ اسلام آباد پولیس نے رینجرز اور ایف سی کے 9 ہزار اہلکاروں کی خدمات طلب کی ہیں۔ اسلا آباد پولیس نے پاک رینجرز کے 5 ہزار اور فرنٹیئر کانسٹیبلری کے 4 ہزار اضافی اہلکاروں کی تعیناتی کی درخواست کی ہے۔ سامان کی خریداری اور نفری بلانے کی سفارشات پر مبنی خط وزارت داخلہ کو بھجوا دیا گیا ہے۔