یو اے ای کی نشاندہی ،حکومت پاکستان نے ہزاروں پاکستانیوں کے پاسپورٹ بلاک کر دیے

اسلام آباد(کھوج نیوز ) حکومت نے متحدہ عرب امارات میں قید 4700 پاکستانیوں کے پاسپورٹ بلاک کر دیے۔ وزارت داخلہ کے مطابق یو اے ای میں 5 ہزار 292 پاکستانی مختلف جرائم میں قید ہیں، متحدہ عرب امارات کی جانب سے حکومت پاکستان کو ان جرائم کی تفصیل فراہم کی گئی ہے۔حکومت نے جرائم میں ملوث پاکستانیوں کے پاسپورٹ بلاک کرنے کا فیصلہ کیا تھا، جس کے بعد اس پر عمل درآمد کر دیا گیا ہے۔

یو اے ای میں منشیات کے جرائم میں ملوث 2470 افراد کے پاسپورٹ بلاک کیے گئے ہیں۔اس کے علاوہ فراڈ، دھوکا دہی اور جنسی ہراسانی میں ملوث 100 پاکستانیوں کے پاسپورٹ، چوری کے جرم میں یو اے ای میں قید 704 پاکستانیوں کے پاسپورٹ بلاک کیے گئے ہیں۔قتل، راہزنی میں ملوث 216 پاکستانیوں کے پاسپورٹ، اور غیر قانونی طور پر یو اے ای میں رہائش پذیر 375 پاکستانیوں کے پاسپورٹ بھی بلاک کر دیے گئے ہیں۔