ایپکس کمیٹی کا اجلاس، علی امین گنڈا پور کی محسن نقوی سے جھپی، کارکنوں کی قربانیاں بھول گئے

پشاور (کھوج نیوز) ایپکس کمیٹی کا اجلاس ، وزیراعلیٰ خیبرپختونخوا علی امین گنڈا پور کی وفاقی وزیر داخلہ محسن نقوی سے جھپی، پی ٹی آئی کے کارکنوں کو بھول گئے جس کے بعد صارفین آپے سے باہر ہو گئے۔

تفصیلات کے مطابق پشاور میں ہونے والے صوبائی ایپکس کمیٹی کے اجلاس میں وزیراعلیٰ کے پی علی امین گنڈاپور، وفاقی وزیرداخلہ محسن نقوی سمیت دیگر اعلی حکام شریک تھے۔اس اجلاس میں وزیرداخلہ محسن نقوی اور وزیراعلی علی امین گنڈاپورکا رویہ دوستانہ رہا۔ ذرائع نے بتایا ہے کہ کہ محسن نقوی نے اجلاس میں کہا کہ قانون نافذ کرنیوالے ادارے آپریشن والے علاقوں میں بھی عوام پر تشدد نہیں کرتے، اس پر علی امین نے کہا کہ ایسے اہلکاروں کو ڈی چوک میں بھی تعینات کیا جاتا، وزیراعلیٰ کے جواب پر محسن نقوی مسکرائے۔

ذرائع کے مطابق وزیراعلیٰ کے پی نے محسن نقوی سے شکوہ کیا کہ بعض پنجاب اور وفاقی وزرا کرم کے مسئلے پر غیر سنجیدہ بیانات دے رہے ہیں، صوبائی حکومت پہلے دن سے مسئلہ حل کرنے میں سنجیدہ ہے، اس پر وزیر داخلہ نے یقین دہانی کرائی کہ وزرا کرم کے مسئلے پر آئندہ ایسے بیانات نہیں دیں گے، مسئلے کے پائیدار حل کے لیے صوبائی حکومت کو سپورٹ کرینگے اور دونوں حکومتیں مل کر کام کریں گی۔