ریکوڈک منصوبے کی تکمیل کے لیے حائل ایک اور رکاوٹ ختم

اسلام آباد(کھوج نیوز) ریکوڈک منصوبے کی نظرثانی شدہ قیمت کا تخمینہ مکمل کر لیا گیا ہے اور دونوں فریق منصوبے کی باریکیوں کو حتمی شکل دینے کے مرحلے میں ہیں۔سعودی عرب پہلے مرحلے میں ریکوڈک منصوبے میں 10 فیصد حصص حاصل کرے گا اور مستقبل میں اپنے حصص بڑھا سکتا ہے۔

ریکوڈک کی تکمیل کی راہ میں ایک بڑی رکاوٹ کو خوش اسلوبی سے حل کیا گیا، کیونکہ سعودی عرب مشینری کی خریداری کے لیے غیر ملکی زرمبادلہ کے استعمال کے لیے پاکستان سے باہر بینک اکاونٹ رکھنا چاہتا تھا۔ تفصیلات کے مطابق اب دونوں فریقین نے اس بات پر اتفاق کیا ہے کہ غیر ملکی زرمبادلہ پاکستان میں لایا جائے گا اور اس سلسلے میں ایک وسیع معاہدہ طے پا گیا ہے۔ذرائع کے مطابق معاہدے کے وقت کا اندازہ لگانا ممکن نہیں ہے لیکن یہ معاہدہ آخری مراحل میں پہنچ رہا ہے اور جلد کسی بھی وقت طے پا سکتا ہے۔

ریکوڈک کے حصص کی نظرثانی شدہ قیمت کے بارے میں منصوبہ ابھی تیاری کے مرحلے میں ہے لیکن نظرثانی کے عمل سے منصوبے کے حصص کی قیمت میں بہتری آئی ہے۔ نظرثانی شدہ قیمت کے نتائج دوسری جانب کے ساتھ شیئر کیے گئے ہیں اور مذاکرات اختتامی مراحل میں ہیں۔ لیکن جب منصوبے کی پیداوار شروع ہوگی تو اس کے حصص کی قیمت آنے والے سالوں میں مزید بڑھنے کی توقع ہے۔ پاکستان نے اس بات کو بھی تسلیم کر لیا ہے کہ کسی بھی تنازعے کی صورت میں مستقل ثالثی عدالت (PCA) یا سرمایہ کاری تنازعات کے تصفیے کے بین الاقوامی مرکز (ICSID) سے رجوع کیا جا سکتا ہے۔