قومی اسمبلی اجلاس، شہباز شریف کی آمد، اپوزیشن کا احتجاج، ایوان مچھلی منڈی میں تبدیل

اسلام آباد(کھوج نیوز) سپیکر قومی اسمبلی سردار ایاز صادق کی زیر صدارت ہونے والے اجلاس میں وزیراعظم شہباز کی آمد پر اپوزیشن نے احتجاج اور شور شرابا کیا جس پر ایوان مچھلی منڈی میں تبدیل ہوگیا۔

تفصیلات کے مطابق اسپیکر ایاز صادق کی زیر صدارت ہونے والے قومی اسمبلی اجلاس میں اپوزیشن ارکان نے وزیر اعظم کے ایوان میں پہنچتے ہی شدید احتجاج کیا اور نعرے لگائے جس کے جواب میں حکومتی ارکان کے شیر آیا شیر آیا کے نعرے لگائے۔ اجلاس میں آسیہ ناز نے اپوزیشن کے شورشرابے کے دوران مرد اور خواتین ووٹروں کے درمیان مسلسل پائے جانے والے صنفی فرق پرتوجہ دلا ؤنوٹس پیش کیا۔ توجہ دلاو نوٹس پر وزیر قانون اعظم نذیر تارڈ نے کہا کہ الیکشن کمیشن اس فرق کو دور کرنے کی کوشش کر رہا ہے،حکومت اس سے متعلق مکمل معاونت فراہم کر رہی ہے، ووٹرز کے صنفی فرق سے متعلق الیکشن کمیشن اپنی ذمہ داریاں پوری کر رہا ہے۔ وزیر قانون نے کہا کہ نادرا اور دیگر ادارے بھی کام کر رہے ہیں، یہ صنفی فرق کم ہوتے ہوتے اب 7 فیصد رہ گیا ہے۔