خیبرپختونخوا میں وزیراعلیٰ اور گورنر کے درمیان اختیارات کی جنگ، علی امین گنڈا پور بازی لے گئے

خیبرپختونخوا (کھوج نیوز) خیبرپختونخوا میں وزیراعلیٰ اور گورنر کے درمیان اختیارات کی جنگ میں علی امین گنڈا پور بازی لے گئے ہیں جس کے بعد کے پی کے حکومت دو حصوں میں تقسیم ہو گئی ہے۔

تفصیلات کے مطابق گزشتہ دنوں خیبرپختونخوا اسمبلی نے خیبرپختونخوا یونیورسٹیزترمیمی بل 2024ء پاس کرکے گورنر کو منظوری کیلئے بھیجا تھا تاہم گورنر نے اعتراض لگا کر بل واپس کردیا تھا۔ آج اسمبلی سیکرٹریٹ نے خیبرپختونخوا یونیورسٹیزترمیمی بل2024ء باقاعدہ قانون بننے کا نوٹیفکیشن جاری کردیا جس کے تحت خیبر پختونخوا میں جامعات کے چانسلر اب وزیراعلی ہوں گے۔ آج سے قبل گورنر تمام یونیورسٹیز کے چانسلر تھے اور ایکٹ کے بعد یہ اختیارات وزیراعلی کو منتقل ہوگئے۔ بل کے تحت اب وزیراعلیٰ علی امین گنڈاپور کو یہ اختیار حاصل ہوگا کہ وہ اکیڈیمک سرچ کمیٹی کی تجویز کردہ تین ناموں میں سے کسی ایک کو وائس چانسلر مقرر کریں۔ بل کے تحت وائس چانسلر کی تقرری کا دورانیہ چار سال مقرر کیا گیا ہے تاہم اگر کارکردگی غیر تسلی بخش ہو تو یہ مدت کسی بھی ختم بھی کی جا سکتی ہے۔