محسن نقوی کا دورہ مارگلہ انکلیو، ترقیاتی کاموں کا جائزہ ، نیا راستہ تعمیر کرنے کی ہدایت

اسلام آباد(کھوج نیوز) اسلام آباد کے مارگلہ انکلیو کے دورے کے دوران وزیرداخلہ محسن نقوی نے مارگلہ انکلیو تک آسان رسائی کے لیے نیا راستہ تعمیر کرنے کی ہدایت کرتے ہوئے راستے میں موجود تجاوزات فوری طور پر ہٹانے کا حکم دے دیا۔

تفصیلات کے مطابق وفاقی وزیرداخلہ محسن نقوی نے سی ڈی اے اور ڈی ایچ اے کے نئے مشترکہ سیکٹر مارگلہ انکلیو کا دورہ کیا۔ اس موقع پر محسن نقوی نے سائٹ پر جا کر جاری ترقیاتی کاموں کا جائزہ لیا ۔ وزیرداخلہ نے مارگلہ انکلیو کے 50 فیصد ترقیاتی کام 14 اگست اور 100 فیصد کام 31 دسمبر تک مکمل کرکے مالکان کو پلاٹس کا قبضہ دینے کا حکم دیا۔ چیئرمین سی ڈی اے محمد علی رندھاوا اور ڈی ایچ اے کے پراجیکٹ ڈائریکٹر نے ڈویلپمنٹ ورک اور سیکٹرز پلاننگ کے بارے بریفنگ دی، بتایا کہ مارگلہ انکلیو میں جھیل بھی بنے گی، مارگلہ انکلیو 10 ہزار کنال اراضی پر بن رہا ہے۔ 5 مرلہ۔ 10 مرلہ اور ایک کنال کے پلاٹس رکھے گئے ہیں ، درخواستیں جمع کرانے کی آخری تاریخ 14 فروری ہے۔

محسن نقوی نے کہا کہ ترقیاتی کاموں کی رفتار کو تیز کیا جائے، ترقیاتی کام جلد مکمل کرنے کے لیے تمام وسائل بروئے کار لائے جائیں۔ محسن نقوی نے مارگلہ انکلیو تک آسان رسائی کے لیے نیا راستہ تعمیر کرنے کی ہدایت کی، کہا کہ رسائی کا متبادل راستہ سے وزیر اعظم ہاوس سے مارگلہ انکلیو تک فاصلہ صرف 5 منٹ تک ہونا چاہیئے۔ وزیر داخلہ محسن نقوی کا مارگلہ انکلیو کے راستے میں تجاوزات فوری طور پر ہٹانے کا حکم دیا، کہا کہ بہترین لوکیشن کی وجہ سے شہریوں نے اس منصوبے میں گہری دلچسپی ظاہر کی ہے، اس منصوبے میں خوبصورت لوکیشن کے ساتھ شہریوں کو تمام معیاری اور جدیدسہولیات فراہم کی جائیں گی۔