سکیورٹی فورسز کی مختلف کارروائیاں، 15خوارج ہلاک
ہلاک خوارج علاقے میں دہشت گردی کی متعدد کارروائیوں میں ملوث تھے اور قانون نافذکرنے والے اداروں کو انتہائی مطلوب تھے: آئی ایس پی آر
خیبرپختونخوا (کھوج نیوز) خیبرپختونخوا میں سکیورٹی فورسز کی 2 مختلف کارروائیوں میں 15 خوارج ہلاک ہوگئے’ سکیورٹی فورسز نے یہ آپریشن خفیہ اطلاعات ڈیرہ اسماعیل خان کے علاقہ میں کیا ۔
تفصیلات کے مطابق آئی ایس پی آر کا کہنا تھا کہ سکیورٹی فورسز نے ڈیرہ اسماعیل خان کے علاقے ہتھالہ میں انٹیلی جنس بیسڈ آپریشن کیا، سکیورٹی فورسز نے خوارج کے ٹھکانے کو مؤثر طریقے سے نشانہ بنایا۔ آئی ایس پی آر کے مطابق کارروائی میں9 خوارج کو جہنم واصل کیا گیا جن میں خارجی گروہ کا سرغنہ فرمان عرف ثاقب بھی شامل ہے، ہلاک خوارج علاقے میں دہشت گردی کی متعدد کارروائیوں میں ملوث تھے اور قانون نافذکرنے والے اداروں کو انتہائی مطلوب تھے۔
آئی ایس پی آر کا کہنا ہے کہ سکیورٹی فورسز نے دوسری کارروائی شمالی وزیرستان کے علاقے میران شاہ میں کی جس میں 6 خوارج مارے گئے۔ آئی ایس پی آر کے مطابق شدید فائرنگ کے تبادلے کے دوران 4 بھی جوان شہید ہوئے۔ آئی ایس پی آر کا کہنا ہے کہ علاقے میں خارجیوں کے خاتمے کے لیے کلیئرنس آپریشن کیے جا رہے ہیں۔ سکیورٹی فورسز دہشت گردی کی لعنت کے خاتمے کے لیے پرعزم ہیں، ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔
