پرویز خٹک نے پی ٹی آئی والوں کو جھوٹا قرار دے دیا

نوشہرہ(کھوج نیوز) خیبرپختونخوا کے سابق وزیراعلیٰ پرویز خٹک نے پاکستان تحریک انصاف (پی ٹی آئی) والوں کو جھوٹا قرار دے دیا ہے ، جس کے بعد ایک نئی بحث کا آغاز ہوگیا ہے۔

تفصیلات کے مطابق پرویز خٹک کا کہنا تھاکہ سیاست میں اپنی پوری زندگی تباہ کردی ہے، ضلع نوشہرہ کے عوام نے ہمارے ساتھ نہیں اپنے ساتھ زیادتی کی ہے۔ انہوں نے کہا کہ سب سے زیادہ جھوٹ بولنے والے تحریک انصاف والے ہیں، آج سے جھوٹ کے خلاف جہاد شروع کروں گا، بطور وزیر اعلی صوبے کے لیے جو کچھ کیا ہے اپنے دم پر کیا ہے، گزشتہ انتخابات میں لوگ اندھے بہرے ہوگئے تھے۔

پرویز خٹک کا کہنا تھا کہ مولاناسے ملاقات کے بعد لوگوں نے جھوٹ بولنا شروع کیا، میں نے کسی پارٹی میں شمولیت کا اعلان نہیں کیا، آج کا جلسہ اپنے خاندان کے اختلافات ختم کرنے کے لیے کیا ہے اور آج جلسہ نہیں عوامی جرگہ تھا۔ جلسے سے خطاب میں پرویز خٹک کے بھائی لیاقت خٹک نے کہا کہ ہم بھائیوں کے درمیان غط فہمیاں دور ہوگئیں۔ پرویز خٹک کا کہنا تھاکہ عوام ایک سال میں صوبائی حکومت سے نالاں ہوچکی ہے، صحت کارڈ میں نے شروع کیا تھا، تعلیم اور پولیس میں اصلاحات میں نے کیے تھے۔ ان کا کہناتھاکہ بہت جلد ایک کتاب لکھنے جارہا ہوں اس میں سب کھل کر لکھوں گا۔