علیمہ خان جے آئی ٹی کے سامنے پیش، کیا سوالات ہوئے؟ تفصیل آگئی

اسلام آباد(کھوج نیوز) پاکستان تحریک انصاف کے بانی عمران خان کی بہن علیمہ خان جے آئی ٹی کے سامنے پیش ہو گئی ہیں ، ان سے کیا سوالات ہوئے؟ اس حوالے سے تفصیل آگئی ہے۔

تفصیلات کے مطابق ذرائع نے بتایا ہے کہ جے آئی ٹی نے تقریبا 6 گھنٹے علیمہ خان سے سوالات کیے اور پی ٹی آئی کے سوشل میڈیا اکاؤنٹس اوران کی مینجمنٹ کے بارے میں پوچھا۔ ذرائع نے بتایاکہ جے آئی ٹی نے علیمہ خان سے پوچھا جبران الیاس سے آپ کا کیا تعلق ہے؟ اس پر علیمہ خان نے کہاکہ جبران الیاس سے کبھی نہیں ملی لیکن رابطہ رہتا ہے اور وہ جبران الیاس کو ٹوئٹس بھیجتی ہیں جو وہ پوسٹ کرتا ہے۔

ذرائع کا کہنا ہے کہ علیمہ خان نے کہا ان کا سیاست سے تعلق نہیں، ساری جدوجہد بھائی کیلئے کر رہی ہیں، کچھ لوگ بانی پی ٹی آئی کا نام بیچ کر پیسہ کمانا چاہتے ہیں۔ ذرائع کے مطابق جے آئی ٹی نے پوچھا کہ آئی ایم ایف کے قرض کے حوالے سے کیوں بیان دیا؟ علیمہ خان نے جواب دیا یہ ہمارے پیسے ہیں تو سوال بنتا ہے۔ ذرائع نے بتایاکہ علیمہ خان نے کہا بانی پی ٹی آئی اورپارٹی کے آفیشل اکانٹس کو وہ اپنی پوسٹیں بھیجتی ہیں جو وہ لگاتے ہیں۔ ذرائع کا کہنا تھاکہ جے آئی ٹی سے دوران تحقیقات علیمہ خان کئی بار الجھ پڑیں اور غصے کا اظہار کیا۔