سوات میں شدید زلزلے کے جھٹکے، شہریوں میں خوف وہراس

سوات (کھوج نیوز) سوات کے شہر مینگورہ اور گردونواح میں شدید زلزلے کے جھٹکے محسوس کیے گئے جس کے بعد شہریوں میں خوف و ہراس پھیل گیا اور لوگ اللہ کا ورد کرتے گھروں سے باہر نکل آئے۔

تفصیلات کے مطابق زلزلہ پیما مرکز نے بتایا ہے کہ زلزلے کی شدت 4.3 ریکارڈ کی گئی ہے۔ زلزلہ پیما مرکز کا کہنا ہے کہ زلزلے کی گہرائی 73 کلومیٹر تھی اور زلزلے کا مرکز کو ہندوکش کا پہاڑی سلسلہ تھا۔ زلزلے کے باعث کسی قسم کے جانی و مالی نقصان کی اطلاع نہیں ملی ہے۔ اس سے قبل آج صبح 10 بج کر 26 منٹ پر بلوچستان میں اورماڑہ کے جنوب مشرق سے 68 کلومیٹر دور سمندر میں زلزلے کے جھٹکے محسوس کیے گئے تھے۔ زلزلہ پیمامرکز کے مطابق زلزلے کی شدت 4.8 ریکارڈ کی گئی اور اس کی گہرائی 18 کلومیٹر تھی۔