پاکستان مسلم لیگ فنکشنل کے سربراہ پیر پگارانے عمران خان کی قید کے بارے میں کیا کہا؟

ملتان(کھوج نیوز)پاکستان مسلم لیگ فنکشنل کے سربراہ ، پیر پگارا نے کہا ہے کہ سابق وزیراعظم چیئرمین پی ٹی آئی قید میں نہیں بلکہ ہم سب قید میں ہیں اور اپنے حقوق سندھ کی بقا اور پاکستان کے استحکام کے لئے مزید جدوجہد کرنے کی ضرورت ہے۔

تفصیلات کے مطابق پیر پگارا نے ملتان کا نجی دورہ کیا جہاں انہوں نے صوبائی سینئر نائب صدر الحاج محمد اشرف قریشی سے خصوصی ملاقات کی۔ اس موقع پر اہم شخصیات اور خلفا موجود تھے۔ محمد اشرف قریشی نے تنظیمی صورتحال پر رپورٹ پیش کی اور جماعت کو مزید فعال کرنے کے حوالے سے مشاورت کی۔

پیر پگارا نے خصوصی طور پر خراج تحسین پیش کرتے ہوئے کہا اس وقت مسلم لیگ فنکشنل جی ڈی اے ملک کی سلامتی، بقا، استحکام کے لئے جدوجہد میں مصروف ہے۔انہوں نے کہا پاکستان مسلم لیگ فنکشنل اہم سیاسی جماعت ہے اور جی ڈی اے اہم الائنس ہے جو ملک بھر میں اپنی جمہوری اور عوامی حقوق کی جنگ میں مصروف ہے، جلد مسلم لیگ فنکشنل کی مرکزی کونسل کا اجلاس طلب کیا جا رہا ہے اور اہم فیصلے کئے جائیں گے، ساتھیوں سے مشاورت اور تجاویز جاری ہے۔