ریحام خان نے سیاسی جماعت بنانے کا اعلان کر دیا

کراچی (کھوج نیوز) پاکستان تحریک انصاف کے بانی عمران خان کی سابقہ اہلیہ ریحام نے بھی نئی سیاسی جماعت بنانے کا اعلان کر دیا ہے اس جماعت کا کیا نام ہوگا؟ تفصیل سامنے آگئی ہے۔

تفصیلات کے مطابق عمران خان کی سابق اہلیہ ریحام خان نے پاکستان ریپبلک پارٹی کے نام سے نئی سیاسی جماعت کا اعلان کردیا۔ ریحام خان نے کہا کہ پاکستانیوں کو جینے نہیں دیا جا رہا، وہ آج سے ایک ایسی تحریک شروع کرنے جا رہی ہیں جو ایوان میں عوامی نمائندگی کرے گی، کراچی سے باقاعدہ تحریک کا آغاز کر رہی ہوں۔ نئی پارٹی کا اعلان کرتے ہوئے ریحام خان نے کہا کہ ہم قوانین میں ایسی تبدیلیاں لائیں گے کہ عوام کو فائدہ ہوگا، خواتین اورکسانوں کی نمائندگی بھی ہونی چاہیے۔ انہوں نے کہا کہ پورا پاکستان ان کا حلقہ ہے ،عوامی مسائل کے حل کے لیے بھر پور جدوجہد کریں گے۔

ریحام خان کا کہنا تھا کہ میں نے زندگی میں ہمیشہ سیاسی جماعتوں سے دوری رکھی، جوکام کیا وہ میرٹ کی بنیاد پرکیا اور لوگوں سے یہی امید رکھتی ہوں۔ ریحام خان نے اپنی سیاسی جماعت کا لوگو بھی جاری کردیا ہے۔ انہوں نے حکومت پر تنقید کرتے ہوئے کہا کہ تاجروں نے شٹرڈاؤن ہڑتال کا اعلان کیا تو وزیر خزانہ تاجروں کو اسلام آباد بلالیتے ہیں، پہلے مشاورت کیوں نہیں کی جاتی؟