سکیورٹی فورسز کی کارروائی، 9خوارج ہلاک
دہشتگرد تنظیم فتنہ الخوارج کے دہشتگردوں کی موجودگی کی اطلاع پر کی گئی اور 4 روزہ آپریشن میں سکیورٹی فورسز نے انتہائی مہارت سے خوارج کے ٹھکانوں کو نشانہ بنایا
خیبرپختونخوا (کھوج نیوز) خیبرپختونخوا کے ضلع مالا کنڈ میں سکیورٹی فورسز نے خفیہ اطلاعات پر مشترکہ کارروائیاں کرتے ہوئے بھارتی حمایت یافتہ 9خوارج کو جہنم واصل کر دیا ہے۔
تفصیلا ت کے مطابق پاک فوج کے شعبہ تعلقات عامہ (آئی ایس پی آر) نے بتایا ہے کہ 16 سے20 جولائی کو مالاکنڈ میں سکیورٹی فورسز، پولیس، لیویز، محکمہ انسداد دہشت گردی (سی ٹی ڈی) اور ضلعی انتظامیہ نے مشترکہ آپریشنز کیے۔ آئی ایس پی آر نے بتایاکہ کارروائیاں بھارتی ایجنسی کی دہشتگرد تنظیم فتنہ الخوارج کے دہشتگردوں کی موجودگی کی اطلاع پر کی گئی اور 4 روزہ آپریشن میں سکیورٹی فورسز نے انتہائی مہارت سے خوارج کے ٹھکانوں کو نشانہ بنایا۔ آئی ایس پی آر نے بتایاکہ شدید فائرنگ کے تبادلے میں بھارتی سرپرستی میں سرگرم 9 خوارج ہلاک اور 8 کو گرفتار کیاگیا۔ آئی ایس پی آر کا کہنا ہے کہ سکیورٹی فورسز کے آپریشن کے دوران خوارج کے زیر استعمال 2 ٹھکانے بھی تباہ کردیے گئے جبکہ دہشت گردوں سے بڑی تعداد میں اسلحہ،گولہ بارود اور دھماکا خیز مواد برآمدکیاگیا۔
