پاکستان اور افغانستان کے درمیان بڑا تجارتی معاہدہ طے

اسلام آباد(کھوج نیوز) پاکستان اور افغانستان کے درمیان بڑا تجارتی معاہدہ طے پا گیا ہے؟ دونوں ملکوں کے درمیان کونسا اور کتنے کروڑ کا معاہدہ طے پایا؟ تمام تر تفصیلات سامنے آگئی ہیں۔

تفصیلات کے مطابق افغان سفارتخانے کے مطابق افغان نائب وزیر صنعت و تجارت ملا احمداللہ زاہد نے ترجیحی تجارتی معاہدے پر دستخط کیے اور پاکستان کی جانب سے سیکرٹری تجارت جواد پال نے معاہدے پر دستخط کیے۔ افغان سفارتخانے نے بتایاکہ معاہدے کے تحت دونوں ممالک کی 4،4 برآمدی اشیا پر ٹیکس میں نمایاں کمی کی گئی جس کے بعد انگور، انار، سیب اور ٹماٹرپرپاکستانی درآمدی ٹیرف 60 فیصد سے کم ہو کر27 فیصد ہوگیا جبکہ پاکستانی آم، کینو، کیلا اور آلو کی افغان درآمد پرٹیرف بھی27 فیصد تک محدود کیا گیا ہے۔ افغان سفارتخانے کا کہنا ہے کہ یہ معاہدہ یکم اگست 2025 سے نافذ العمل ہوگا اور ایک سال کیلئے مؤثر ہو گا، معاہدہ قابل تجدید ہے اور مستقبل میں مزید اشیا شامل کرنے کی اجازت دیتا ہے۔