امریکی سینٹ کام کے کمانڈر کو نشان امتیاز ملٹری اعزاز سے نواز دیا گیا

اسلام آباد(کھوج نیوز) یونائٹیڈ اسٹیٹس سنیٹرل کمانڈ (سینٹ کام ) کے کمانڈر جنرل مائیکل ایرک کوریلا کو نشان امتیاز ملٹری اعزاز سے نوازا گیا یہ اعزاز صدر مملکت آصف علی زرداری نے عطا کیا۔

تفصیلات کے مطابق پاک فوج کے شعبہ تعلقات عامہ (آئی ایس پی آر) نے بتایا ہے کہ صدر آصف زرداری نے ایوانِ صدر میں باوقار تقریب میں جنرل کوریلا کو اعزاز عطا کیا۔ آئی ایس پی آر نے بتایاکہ جنرل کوریلا نے مسلح افواج اور سینٹ کام کے درمیان انسدادِ دہشت گردی کے اشتراک کو گہرا کرنے میں اہم کردار ادا کیا، ان کی مستقل وابستگی پاکستان کے خطے میں امن واستحکام میں مرکزی کردار کیلئے گہرے احترام کی عکاس ہے، یہ اعزاز جنرل کوریلا کی غیر متزلزل حمایت پر پاکستان کے گہرے شکریہ کا اظہار ہے۔ آئی ایس پی آر کے مطابق جنرل کوریلا کیلئے یہ اعزاز دوطرفہ عسکری شراکت داری میں بڑھتی ہوئی گہرائی کی توثیق کرتا ہے، اعلی سطح کی پذیرائی پاکستان اور امریکا کے درمیان دیرپا تذویراتی تعلقات کو اجاگرکرتی ہے اور یہ علاقائی امن،سلامتی اورطویل المدتی دفاعی تعاون کیلیے دونوں ممالک کیمشترکہ عزم کی تصدیق کرتی ہے۔ آئی ایس پی آر کے مطابق جنرل کوریلا نے اپنے دورے کے دوران پاکستان کی اعلی سیاسی و عسکری قیادت سے تفصیلی ملاقاتیں کیں، جنرل کوریلا نے صدرِ پاکستان اورآرمی چیف فیلڈ مارشل سید عاصم منیر سے ملاقات کی۔ ملاقاتوں میں علاقائی سلامتی، عسکری تعاون، دہشت گردی، ابھرتے بین الاقوامی خطرات سے مشترکہ طور پر نمٹنے کے امور پر تبادلہ خیال کیا گیا۔

آئی ایس پی آر نے بتایاکہ جنرل مائیکل کوریلا کو پاک امریکا عسکری تعاون کو فروغ دینے میں مثالی خدمات پر اعزازسے نوازا گیا۔ صدرپاکستان نے علاقائی سلامتی کیلئے جنرل کوریلا کی غیر معمولی خدمات، دونوں ممالک کے درمیان اسٹریٹجک دفاعی روابط مضبوط بنانیکی کوششوں کو سراہا۔ ایوانِ صدر آمد پر جنرل کوریلا کو تینوں مسلح افواج کے چاق و چوبند دستے نے گارڈ آف آنر پیش کیا، جنرل کوریلا کی بصیرت افروز قیادت نے باہمی افہام و تفہیم کو فروغ دینے اور دفاعی تعاون کو وسعت دینے میں کردار ادا کیا۔