چینی بحران کے باوجود شوگر ملز مالکان ارب پتی بن گئے

اسلام آباد(کھوج نیوز) ملک بھر میں چلنے والے موجودہ چینی بحران کے باوجود شوگر ملز مالکان ارب پتی بن گئے ہیں، اس حوالے سے آڈیٹر جنرل نے پارلیمنٹ کی پبلک اکائونٹس کمیٹی کو بتا دیا۔

تفصیلات کے مطابق پبلک اکاؤنٹس کمیٹی کے اجلاس میں آڈیٹر جنرل نے کہا کہ اگر حکومت کہے گی تو چینی کے موجودہ بحران کا آڈٹ کر دیں گے۔ چیئرمین پبلک اکاؤنٹس کمیٹی جنید اکبر خان نے کہا کہ42 خاندانوں نے یہ 300 ارب روپے کمائے ہیں۔ رکن کمیٹی ریاض فتیانہ نے کہا کہ چینی کی قیمت کی مد میں قوم کے ساتھ287 ارب روپے کا دھوکا کیا گیا،کیا وجہ تھی کہ راتوں رات ایس آر او جاری کرکے ٹیکسوں میں چھوٹ دی گئی۔ خواجہ شیراز نے کہا کہ کسان کا استحصال کرنے کے لیے تمام حکومتی ادارے ایک ہوجاتے ہیں۔

معین عامر پیرزادہ نے کہا کہ ان شوگر ملز کے مالکان کون ہیں، ایکس مل قیمت میں ہر مہینے 2 روپے کا اضافہ کس بنیاد پر ہو رہا ہے؟ سنی اتحادکونسل کے رکن قومی اسمبلی عامر ڈوگر نے الزام لگایا کہ سب سے زیادہ ملز آصف علی زرداری کی ہیں، دوسرے نمبر پر جہانگیر ترین اور تیسرے نمبر پر شریف خاندان کی ملز ہیں۔ اس پر ن لیگ کے سینیٹر افنان اللہ نے کہا کہ عامر ڈوگر نے یہ نہیں بتایا کہ ان کی پارٹی کس کے پیسے سے بنی، شازیہ مری بولیں الزامات لگانے کے بجائے ثابت کریں۔