حق دو بلوچستان لانگ مارچ، لاہور پولیس سیسہ پلائی دیوار بن گئی

لاہور(کھوج نیوز) مولانا ہدایت الرحمان کی زیر قیادت ”حق دو بلوچستان لانگ مارچ” کے آگے لاہور پولیس سیسہ پلائی دیوار بن گئی، جس کے بعد تصادم کا بھی اندیشہ ہے۔

تفصیلات کے مطابق لاہورمیں پولیس کی بھاری نفری منصورہ کے باہر جمع ہوگئی اور مولانا ہدایت الرحمن کی زیر قیادت حق دو بلوچستان لانگ مارچ کو اسلام آباد روانہ ہونے سے روکا۔ سینئر صوبائی وزیر مریم اورنگزیب حکومتی وفد ہمراہ منصورہ پہنچیں اور جماعت اسلامی کے رہنماؤں سے مذاکرات کیے اور جماعت کے رہنماؤں کی وزیراعلیٰ مریم نوازسے ٹیلی فون پربات بھی کروائی گئی۔ وزیراعلیٰ نے جماعت اسلامی سے رابطے کیلئے کمیٹی بنانے کی تجویز دی لیکن جماعت اسلامی کے رہنما لانگ مارچ اسلام آباد لے جانے سے پیچھے نہ ہٹے۔

پنجاب حکومت اور جماعت اسلامی میں ”حق دو بلوچستان لانگ مارچ” رکوانے کیلئے مذاکرات بے نتیجہ رہے جبکہ جماعت اسلامی اسلام آباد جانے کیلئے ڈٹ گئی۔ لیاقت بلوچ کاکہناتھا کہ حکومتی وفد پر واضح کردیا ہے کہ لانگ مارچ ہر صورت اسلام آباد پہنچے گا، دونوں اطرف سے کمیٹی بنانے پر اتفاق ہوا ہے، امید ہے کہ حل نکل آئے گا۔ لانگ مارچ کے قائد مولانا ہدایت الرحمان کا کہنا تھا کہ ہمارا احتجاج پرامن ہے اور پروگرام کے مطابق اسلام آباد جائیں گے۔